HAFLONG: Zani (12-1-2011) khan N.C.Hills, Assam ah Assam sawrkar le HPC(D) Assam Region han Ceasefire (inkapchawl) an puong hnunga a ṭum hnina dingin Hmar haiin Assam state sunga an Political Demand a fethleng theina dinga inbiekna an nei.HPC(D) Vice Chairman, Assam Region, Elvis L. Hmar a inthawk ei thu dawngnain a hril danin Asam sawrkrin hmar hai bo chun Dimasa hai buoina hi chingfel a hung ni theina ding chun Hmar hai le inremna tluontling siem a pawimaw zie a hriet a. Hmarram le hnam aiawa HPC(D) hmalaknaa hnuoiah sawrkar leh vawisun (13-1-2012) zantieng 2:00PM hin Assam sawrkar leh nei nawk ning a tih.
Hmar hnamin hun sawt taka inthawka ei lo tinzawm Mizoram- a Hmar hminga District nei ei tum ang chu Assam a khawm nei dinga inpuocha a nih. Assam sawrkar khawmin hi kawnga hin kawt lientak a mi hawng pek a, Hmar hnam sunga NGOs po po le ṭhangkhawmin HPC(D) Assam Region chun hma a lak zing a nih.
Manipur ah Election Politics leiin HPC(D) hming chawia Pawl chite te, chu pawl-kha pawl ti hai hi kan hrietpui nawh. HPC(D) chu HPC(D) ani angin HPC(D) ni zing a tih. Tukhawmin HPC(D) hming hmangin Election-ah hlawkna /hamṭhatna zawng theinaw ni hai. Hmar mipui hi, ei thu le hla lovin Assam, Manipur, Meghalaya, Mizoram, Tripura haia Political boundary mak tak tak hmangin ṭhedarin ei um a. Ei thu le hla ni lovin se lut hnunga sedai kei in states 4/5 velah India danpui hnuoi dang dangah ruohmanna remchang zawnga hma ei lakna hi ei mipui hai hin a harsatna ah inthuruola ṭhang la seng dingin ei in ngen a nih. Ei ram ei hnam, ei vawisunni a ei harsatna hi ei inṭawm sinaw chun ei lawm inruol naw nih. Chuleiin ei vawisun hun hi HPC(D) chun inṭhe hun ni lovin inhrietsuok hun dingin a ditsak hle.
Tuta Assam-a Hmar hai ta ding bika hma ei lakna hi, Assam sawrkar chun Hmar hai buoina N.C.Hills le Cachar ah inremna tluontling um thei dingin an ngainaw lei a nih. Hi lei tak hi Assam sawrkar khawmin HPC(D) hai chu Hmar hai aiawin inremna tluontling siempui an nuom nasan a nih. Elvis L. Hmar chun, HPC(D) cadres 60 vel chu an silai ṭha (sophisticated weapons) 30 chuong hai leh Assam sawrkar phutna angin Republic Day hmain Assam sawrkar le Govt. of India le inremna tluontling siem an tih tiin a hril. HPC(D) chun Manipur a pawl dang dang lei le Election boruok leia hnam hming changchawiin inremnawna le inṭhedarna siemtuhai hi hnawla hrethiem dingin a ngen takmeu a nih. Thudik chu Pathien in a ṭan tlat si leiin, tiin Elvis L. Hmar chun a hril.
~HmasawnnaThar
