SETANIC / SATANIC

~Joshua Amo

Tulai chu ei fena tieng tieng, ei nghatna tieng tieng, ti ti sepa gawpna hmun hai le um bumna hmun a um met hai le mi tamtak hril nuom chu Setanic/Satanic/Satanism hi a nih. Mi tamtak ringna chu a sukhning ngei ka ring ta bawk. Thu khel le indiklo tamtak um hai lak a inthawk hin ei fimkhur a ṭul tak zet a nih.

Setanic/Satanic hai chu tu ham??? Mi thar le thilthar an ni nawh. Juda Lekhathawn Suina Rev. D. Ruolngulin a zieka chun, " Eini lai khawm Setan kohrana ṭhang ringtu inti ve si hi tamtak ei lo um ve ta el rawm chu ! Hieng ang inchuktirna hi inchuktirna thar an ni nawh a, tienlai Kohran inkhawmpui ( Council ) in an lo hnawl tasa vawng an nih. Eini lai thil thar angin a hung inlanga. Ei hrietnaw lei chau a nih. Tienlaia inchuktirtu tehlemhaiin an lo inchuktir tah hnawla lo um tahnung sukthar nawkna mei mei a nih ti hriet a ṭul a nih. Hieng ang inchuktirna a hung theina san chu Pathien thutak ei hrietnaw em lei chau a nih."

Tulaia Satanic tia mi tam takin a sun a zana an hril huoi huoi, an khek pui hai hi teh? Ieng ang mizie put am an ni leh? Ki pahni nei am a nih? Khawlam an khawsa in khawlam an cheng hlak? Iem ana an fak hmuna? An hming, an khuo le veng, an sung le kuo hai hung hril ro ṭawngṭainaa hriet ding...??? Satanic an nih ti a proof in pe thei ei um am? Hi question ei in pek hai hi a dawn thei ei um meu dim chu maw...? Ka ring rak naw ngei. Satanic tia an khek-indur pui el hai hi ei ni’n ei siem fawm mei mei an lo ni lem el thei a nih aw ti hi inlau a um ngei.

Churachandpurah Setanic hai nasatakin an pung, member khawm 1000 chuong an ni tah ti hai dam hi tulai chu nasa em emin an thang. Hienghai hin mi tamtak lungril chu a ṭhawnga, a buoi khawm ei tam vieu ring a um. Amiruokchu, Setanic hi 1000 chuong zet zet khawm an um ka ring naw a um khawm hi an um meu dim a nih ti ka ringhla. A proof nei tukhawm an um nawh. “ An tih ” ti vawng a nih. Nikhat lai el khawm khan ManipurExpress front pageah chun Lamka thlanmuolah Setanic hai inthawina an ti chu an suklang. A ri hi a nasata hrim hrima, tlangval hawklak \henkhat ta ding chun khang ang lo va thaw zau hai khawm kha thil harsa ding chu an ta nawh. Eini khawm ei nuom vang vang an ta’n nawm. A tlangpuiin hienga an ring le an hril ri hai hi Dendrite/Damdawi inrui hai hi an ni deu tlangpui. Mihriem ringthu ve mei mei a nih tulaia ei Ccpur chanchin hih. Chun, hieng ang lawm lawma hieng ang thu an lar el thei nasan dang awm chu, rawngbawltu suma ruoithei ei pung peia. Mani hming insuk challang nuomna lei hai dam a ni zing tah. “ Hlawfa anga ruoi thei zawlnei : Hlaw hmuna a ni phawt chun nuom nuom thaw dinga ruoi el thei zawlnei an nih. Thawdinga ṭha a ni le ni naw an ngaituo nawh a, a pe rawn thei tu tu in an iruoi el thei zawlnei ( prophet for hire ) an nih.”[ Juda Lekhathawn Suina - V, page 29 - 30 ]

Chu khelah chun a Pathienthu a intuo nghet tumna nek hmanin Satanic an pung hrat, a chu a kha ti haia intu nghet hi ei sin ang ela nei pawl vang vang khawm ei um. Satanic ti chu ieng dinga ei ṭi puirak am? Ieng dinga hieng lawm lawma nasah a hi hril rik kher am an leh? Churachandpur, Kristien za ah za umna hmuna Satanic an um ti khawm chu thil inzakum a ni ti pawl khawm um mei ei tih. Chuonglai zing chun Setan khawm Kristienhai hratna hmun hmunah chu hratve tum ngei ṭhang nasa nawk zuolin a lak ve hlak a nih ti hi hriet pum zingin Pathienthu a ei intuo nghet a pawimaw lem, a Satanic thua intuo rak nek khan.

Chun, Satanic ei ti hai hi nuoma zakuo dum le kekawr duma inbela, kekawr khingtienga chain inkhaitlak tira khawlai dunga invak vel mei mei el hi a ni nawh, a lo ni awm. Satanic ni ding chun thil harsatak tak an fethleng ve tho thu an hril a nih. Setan a ni lei ela ei nuom anga ei bik el thei khawm a ni chuong naw nih. Tulai mi ṭhenkhat tamtak hai lem chun Setan a ni lei ela nuoma ṭawngsie inphura deusaw el thaw hai khawm ei bo ta nawh. “ Nisienlakhawm, Mikael, vantirko chunghnungtak hman khan Diebol leh an inthawha, Mosie ruong thua an insel laiin Diebol chungthu rorelpekin a hrilsiet ngam nawha, ‘ Lalpa’n hal lem rawse che ’ ( Juda 1 : 9 ) a ti ta lem a.

Hieng a ni leiin a Satan khawm nisien a ieng ieng khawm nisien thil reng reng chu fimkhur tak le ṭhataka hma ei lak pei chu a ṭul a nih. Satanic thua intuo intuo el lova Pathienthu indiktaka ei intuo nghet ngei ei nuomin ei beisei lem a nih. Ṭawngṭaina le Bible tiem rawn chu makmaw a nih.