[/caption]Aizawl:
Home Minister R Lalzirliana chuan Mizoram-ah hel an awm loh thu leh HPC(D) te chu fapa awm tha duh lo ang chauha sorkarin an ngaih thu a sawi a. HPC(D) te chu – “Dan pawna hnawl pawh an ni lo a, keini chuan fapa awm tha duh lo ang chauhah kan ngai a, hel pawla puan hi kan phal lo a ni,” a ti.
He thu hi vawiin Congress Bhavan-a Political Session neihah Home Minister hian a sawi a. Central Home Ministry-in Mizoram-ah hel pawl pathum lai awm anga a sawi chu pawi a tih thu sawiin, “Mizoram-ah hel an awm lo,” a ti a. Hei vang hian nikumah Nagaland sorkarin hel beih nan cheng vaibelchhe 80 a hman laiin, Mizoram sorkar chuan vaibelchhe khatmah hel beih nan a hmang lo,” a ti bawk.
Home Minister chuan hel pawl anga ngaih theih, HPC(D) te chu hel an ni lo tih sawiin, pa in fapa a nei a, a fapa in thil ngiat a neih avanga kawhmawh bawl ang a ni, a ti a. August ni 25-a Sakawrdai-a Peace Procession an neih chu thil tha tak ni tura a ngaih thu leh, hei hi sorkar leh HPC(D) te inbe leh tura mipuiin an duh vang nia a ngaih thu a sawi.
Congress sorkar veleh HPC(D) ten inbiak an duh thu sorkarah an thlen thu te, tum hnih khat an inbiak tawh thu leh, hemi hnu hian an aiawha Mizoram sorkar be tura duh an neih thu HPC(D) lamin an thlen thu te Home Minister R Lalzirliana chuan a sawi a. Sorkar be tura an duhte hi Mizoram mi leh sa pawh ni lo, Mizoram-a In leh lo pawh nei lo, USA leh leh Delhi-a awm te an nih avang leh, Hmar hnam nen hrim hrima buaina thil a nih loh avangin sorkar chuan Mizoram chhunga harsatna sawi thei turah a ngai lo a ni, a ti.
Heti anga pawn lam mi an tel chuan ngaihsual theih thil te a awm ang a, a inep zawngin thil a kal mai ang tih hlauhna avangin HPC(D) in an aiawh tura an tihte chu sorkarin a pawm thei lo tih sawiin, “Anmahni emaw, Mizoram chhunga tute emaw an aiawha biak chu a theih thu kan hrilh,” a ti a. Sorkarin tum hnih inbiakna tur ruahman lehin, an kal velna tur motor nen lam buaipui vek a ni si a, anmahni lam an lokal loh avangin inbiakna chu chhunzawm theih a ni ta lo niin a sawi bawk.
Tuna HPC(D) leh Mizoram sorkar an inbiak tak lohna chhan a sawi dan chuan, Chief Minister zahawmtak Lal Than-hawla Delhi kal tumin, Home Ministry lamin HPC(D) te chu inbiakna an neihpui mek lai, designated camp-a awm an nih avangin Mizoram sorkar chuan a hranin lo be tawh suh u an lo tih vanga central sorkar kuta inbiakna chu daha chawlhsan a ni ta tih a sawi a ni.
“Delhi nen an inbe rem thei lo a nih chuan Sakawrdai-a Peace Procession khan rah tha rawn chhuah se kan duh hle a ni,” Home Minister chuan a ti a. “Hmar an ni emaw, Tuikuk an ni emaw, Mizoramah hian Mizo an nihna anga cheng turin kan duh a. Hnam bil ang erawh chuan tumah hian rorelna hrang nei se tih he sorkar hian a duh lova, tu sorkar mahin a duhin a rinawm lo,” tiin, “Mizoram-a eng hnam mah hi Act hial ngai khawpa inrelbawlna hrang neia awm turin kanduh lo a, Mizoram hi kan zavaia kan ta a nih anga khawsa tlang turin kan duh a ni,” a ti bawk.
Kawngzawhnaa thusawitute HPC lemchang an ni : HPC
LH Tharzela, General Secretary, HPC Gen. Hqrs., Sakawrdai thuchhuah tarlan danin, August ni 25, 2011-a HPC Area khaw pahnih – Sakawrdai leh Saiphai-a kawngzawhnaa HPC Party hruaitu anga thu sawitute chu HPC Gen.Hqrs. ah nihna engmah nei lo, lemchang mai an ni, a ti.
Thuchhuahin a tarlan zel dan chuan kawng Ministry of Home Affairs, Govt. of India-in hmarchhak state Chief Secretary te hnenah notification a chhuah angin, state sorkar tan hel pawl chi reng reng be lo tur leh inrawlh lo tura hriattir an ni tawh a ni, a ti a. Hemi chungchang hi central sorkar hmalakna tur a ni tawh tih hmarchhak state hrang hrang sorkarah March ni 10, 2011 khan notification tih-chhuah a ni tawh a ni, a ti bawk.
Ningani-a kawngzawhnaa HPC hruaitu intia thusawitute chu October, 2009 Mizoram Budget Session-a Chief Miniser-in ‘Rampawn lam mi’ a tihte an nih thu leh, tun hnu-ah HPC Party hruaitu anga inchhal tawh lo turin HPC Gen.Hqrs. chuan a hriattir nghal tih thuchhuahah hian tarlan a ni.
~The Zozam Times
