NU HAI INRENGIN CHIBAI VOCHUOM...

~ Rose Pulamte

Nu; Sungkuo ta dinga nisa lum hnuoia kut dawa nauhai ta dinga bu vawikhat fak bek titu hai...
Nu; Mani nau le te hai hmun dang dang a inchuka umhai ta dinga ringum taka insung le nauhai ta dinga ma loa thawngtaitu hai...
Nu; A sur a sa hnuoi a sin thawa nauhai ta ding le insung ta dinga sin inrimtu hai...
Nu; An nauhai le pasal hai ral hmuna umhai ta dinga lo tawngtai mawl mawl hlaktu le vawikhat bek la hmu nawk beiseitu hai...

Nu; Hmeithai mani insung Nu le Pa tak ni a iengkima insung mawphurtu hai...

Nu; Insung harsatna sawmdawl ding le insung mamaw hai phuruk dinga sawl em em a harsa taka thawtu hai....

Nu; Mani insung dingchang dinga mani nina le inchukna hnawl a insungnu changa sungkuo indintu dinga nun hlantu le enkawltu hai....

Nu; Ama chang phaklo inchukna, a nauhai lekha inchuktir theina dinga midang inah hlawfa annawleh kawthlera hai  sinthawtu le inrim taka thawktu hai...

Nu; Mani Tu le te ngei neia Pi hung ni ta hai...

Nu; Naute phing sunga paia Nu la hung ni ding hai...


Lalpa Pathienin Malsawm seng raw se cheu;
Nu hai lawmthu ka hril cheu..

Thla kuo lai in phing sunga mi humhimin in mi chawi a,
In nuom thil le du hai nekin kata dinga hrisel ding hai ka ni ding ang kani naw inlau leia insumna le inpek zona leiin...
Khawvel min hmutir dinga ka pieng a i natna raptlak tuorna leiin...
Mi Chawilien le seilien dinga harsatna i tuor hai le i tha le zung i seng hai popo leiin....
Chawl hmanlo a i min chuktirna le hringnun lam indik i min chuktirna dinga i tuorna le thawna hai leiin....
Ka exam ding le ka damnaw chang a zankhuo a imu intuo loa in rimna hai leiin....
Ka ta dinga i lungngaina hai popo leiin...
Ka ta dinga ma loa I tawngtaina hai leiin..
Ka thil dit le nuom hai ienganga  harsa khawma imi suk puitling pek leiin...
Thil pawimaw tak HMANGAINA chuoilo imi pek leiin.....

Ka lawm ie..

International Women's Day 08 March 2015: Theme : Make it Happen

~ Pulamte Rose

Nuhmeihai Ni hin Nuhmeihai po po inrengin chibai ka buk cheu!
International Women’s Day hi kum tin March ni 8 hin inser hlak anih.
International Women’s Day chu March ni 19, 1911 khan Austria, Denmark, Germany le Switzerland-ah inser tan a nih. Hi ni hin banner hai chawia lam hrawna hun neiin anlo hmang anih.
August thla, kum 1910 khan International Women’s Conference chun Copenhagen-ah meeting neiin IWD hi nei dan ding anlo rel a, a Ni ding chie hi thlang bik la um chuong loin hmang ding anih tiin anlo sukfel ta anih. Hi hunser hin a thiltum tak chu nuhmeihai chanvo inang sie pek ding ti hi anih.

International Women’s Day kum 1914 a an hmang chu March Ni 8 in anlo hmanga, chutaka inthawk chun kum tin March Ni 8 hi hmang ahung ni tah pei anih. Hi tum a an hmangna a hin Germany a nuhmei hai vote thlak phalna ding nawr anih. Kum 1922 hnungtieng chu rambung dang dang hieng China a hai chen khawm inser a hung ni ta.
Hi Nuhmei hai Nipui hi a hmang dan tlangpui chu programme dang dang hieng seminar, lamhrawna, presentations, thuhrilna le activity dang dang neia hmang hlak anih. Nuhmeihai inchukna kawngah le an khawsakna suk changkangna kawngah hmalak dan ngaituo le thanglak dan ding buoipuina hun in an hmang hlak bawk. Nuhmei sawrkar sin nei, mania sumdawngna nei, School zirtirtuhai, insung enkawltu leh nuhmei taphawt chun an ngaipawimawin an inser hlak. Thenkhat chu an pasalhai le an nau hai damin chawimawina le inzana inentirna in parte leh fakthei chi hrang hrang dam an pekin an siempek hlaka, hi ni hin insung sinthaw hai an inawl bawk hlak.

International Women’s Day hi India a khawm nasataka inser anih. India a hin abikin Nuhmei hai ngirhmun hi ala'n hnuoi em em a, chuleiin Nuhmei thuoituhai Organisation dang dang ami ha’n hi Ni hi remchanga lain thang nasatakin an lak hlak. Nuhmei ngirhmun, inchukna le taksa hriselna le society a an ngirhmun suksang tumin thang lak anih hlak. Nuhmei hai hi Hindu sakhuona ah chu an siesang khawpel amiruokchu tulai khawvela chu an nina an hnuoi ta hle. India ram Hmar tieng a chu nuhmeite pienghlim hi an that hlaka pasalte an ngaihlu lem leiin, a tawpah chu nuhmei ding khawm anni lai an inhmu zo ta ngainawh anih.

India Hmarsak tieng ruok chu nuhmei le pasal hi an thehrang bek nawh. Ei sakhuona lei le ei society inthuoidan lei khawm ni mei atih. Ei pi le puhai a inthawk khan nuhmei le pasal hi ditsak bik um chuong lovin eilo khawsa anih. Tulai khawvela lem chu nuhmei hai hi insung an ngaituoin ramdang hmundangah sinthawin an sung le kuo hai an chawm lem tah anih.

Nuhmei hai hi pawimawna tamtak annei a, Insung indin na kawngah, nau le te enkawlna kawngah le sakhuona ah khawm pawimaw na tamtak annei anih. Bible chun nuhmei tha in a in a bawl ati ang khan nuhmei tha chun a in chau niloin hnam le ram khawm a siemtha thei anih.

Tulai khawvela hin nuhmei tamtak chu thawveng tak le zalen tak khawm ei um ta tho, amiruokchu a ieng khawm nisien nuhmei hai hi ei society ah an pawimaw em em anih.

Vawisun nuhmeihai ta dinga hun ruot bik a hin ei rengin nuhmei hai pawimaw zie le hlutzie le tangkai zie hi a thara hrie in chawikang le chawisang tum seng eitiu. Nuhmei hai hi bel kawi awl anni an ti hlak kha, chuleiin duottak le hmangaitakin enkawl ei tiu. Nuhmei chu NAUNU, NUNGHAK, NU anih.

Nuhmeihai hi parte mawitak ang anni ang hrimin an mawina le an thatna hi suksiet tum loin a neka nasa in an parsuok theina dingin thang la seng eitiu. Hmangaitak le duot takin enkawl eitiu!