Mizoram sawrkar leh HPC-D (LF) ha'n inremna thuthlung an ziek

Sakawrdai, April 14: Vawisûn chawnhnung dâ 1:00 khan Mizoram Sawrkar le Hmar People’s Convention-Democratic (Lalhmingthanga Sanate’s Faction) hai chun Vengpui Community Hall, Sakawrdai-ah Memorandum of Settlement an lo ziekfel tah. DIPR Mizoram in report a pek chu hung tarlang an nih.

Sakawrdai, 14th April, 2026 : Vawiin chawhnu dar 1:00 khan Mizoram Sorkar leh Hmar People’s Convention-Democratic (Lalhmingthanga Sanate’s Faction) te chuan Vengpui Community Hall, Sakawrdai-ah Memorandum of Settlement an ziakfel a. Memorandum of Settlement-ah hian Mizoram Sorkar aiawhin Pu David Lalthantluanga, IAS, Secretary, Home Department, Government of Mizoram, chuan hming a ziak a. Hmar People’s Convention-Democratic (Lalhmingthanga Sanate’s Faction) aiawhin an President Pu Lalhmingthanga Sanate-in hming a ziak bawk a ni. Pu Lalmuanpuia Punte, MLA, Adviser to Chief Minister, Mizoram (Political) leh Pu Rodingliana Chawngthu, IPS, DIG (Northern Range) ten Memorandum of Settlement ziahna hun hi a hmanpui a ni.

Pu Lalmuanpuia Punte, MLA, Adviser to CM ni bawk chuan he hunah hian thuchah sawiin, hmasawnna kan hmuh tur anga kan ngaih kan hmuh tawk loh vanga helna lo chhuak a ni thin a, vawiina inremna hian hmasawnna hnathawh a keng tel tih sawiin a hlawhtlinna tluan tling kan hmuh ngei ka beisei a ni a ti a. HPC leh HPC-D te nen inremna ziah a nih khan Aizawl khawpuiah mi tlemte hriatpuiin kan ziak a, tun tumah Sakawrdaiah mipui hriatpui leh hmuhpuiin inremna kan ziak hi a lawmawm a, hnam bil helpawl Mizoramah an awm tawh lo niin kan hria hi ka lawm takzet a ni a ti.

Mizoram sawrkar aiawha thusawitu Home Secretary Pu David Lalthantluanga chuan Mizoramin remna leh muanna kawnga rahbi thar kan kai hi a lawmawmin a hlu takzet a ni a ti a. HPC hi kum 1986 ah a piang a, 1994 ah remna thuthlung ziahpui an ni a, 2018 ah HPC atanga peng chhuak HPC (D) te nen inremna thuthlung ziah a ni leh a, vawiin niah peng dang leh HPC-D (LF) te nen inremna ziah a ni leh a ni a ti a, Mizorama ralthuam keng hel pawl an awm tawh lo chu a thlamuanthlak hle a ni a ti.

Home Secretary chuan Mauchar khaw daiah HPC-D (LF) te awm lailawkna tur peace camp siam a nih thu sawiin, April ni 30, 2026 ah silai tun (laying of arms) inkhawm neih a nih tur thu a sawi a, Pu Lalhmingthanga Sanate leh a pawl ten silai chelek tawh lova nunphung pangngai zawm tura an rawn chhuak chu a lawmawm takzet a ni a ti a, 2047 ral hma a India ram hi ram changkang (developed country) a hlankai tumin sawrkar laipuiin hma a la a, hetih rual hian Mizoram sawrkar pawhin "Transform Mizoram 2047" thupuia neiin theihtawp a chhuah ve mek a, Mizoram kil tin hi rualkhai taka hma kan sawn a, kan changkan rual theihna turin hmathlir thui tak a nei tih a sawi a, hemi tihlawhtling tur chuan sawrkar chauh ni lovin, mipui zawng zawngte nen pheikhai rual tak leh inringtawn tak chunga kan kal a ngai a ni a ti a, remna tluantling a awm theihnan duhsakna a hlan a ni.

Thusawitu dang HPC-D (LF) President, Pu Lalhmingthanga Sanate pawhin kum 33 chhung an ralmu tih sawiin, inremna thleng tur hian thil tam tak an chân a ni a ti a. Chief Minister Pu Lalduhoma, Home Ministet Pu K. Sapdanga, Adviser to CM (Political) Pu Lalmuanpuia Punte bakah Home Department officialte chungah lawmthu a sawi a, an duhthusam ang tak inremna chu a ni lo chungin lungawi tawn theihna tur thil a ni chu lawmawm a tih thu a sawi a, Hmar tlangdung hmasawnna tur Mizoram sawrkarin a ngaihsak dawn a ni tih rinna nen nunphung pangngai zawm turin an rawn chhuak a ni a ti a. Anni lam pawhin inremna thuthlung tihlawhtling turin theihtawp an chhuah dawn tih a sawi bawk a ni.

Mizoram sawrkar chuan Mizoram chhunga ralthuam keng chi bil hel pawl la awm chhun nia hriat HPC-D (LF) te hi 2024 kum laihawl atangin a dawr tan a, September ni 20, 2024 khan Silchar Mizoram House ah inbiakna hmasa ber (first round of peace talk) neih a ni a, boruak tha tak hnuaiah inthlahliam a ni. October ni 10, 2025 ah Assembly Speaker Pu Lalbiakzama pisaah inbiak vawi 2-na neih a ni a, hetah hian an thil phut (charter of demand) an rawn pharh a, tha takin sawiho a ni.

Hemi hnu hian Home Minister kaihhruai Committee lian din a ni a, October ni 28, 2025 khan thutkhawm a ni a, inbiakna neih tawh dan thlirho niin HPC-D (LF) te demand sawiho a nih bakah Mizoram sawrkar duhdan te sawifel a ni.

December ni 1, 2025 khan Aijal Club-ah inbiak vawi 3-na neih leh a ni a, Mizoram sorkar duhdan te hrilhhriat an ni a, December ni 2, 2025 ah HPC-D (LF) te hian Mizoram sorkar duhdan an pawm thu leh anmahni lam thil phut thenkhat ziakin Home Department ah an thlen a, official level ah indawr chhunzawm zel niin, March ni 30, 2026 ah Adviser to CM (Political) Pu Lalmuanpuia Punte pisaah inbiakna hnuhnung ber neih a ni a, engkim a tul tur ang ang sawiho niin April ni 9, 2026 khan Home Minister hova official pawimawh kalkhawmten uluk takin an thirho hnuah ruahmanna siam a ni a, vawiinah inremna ziahfel a ni thei ta a ni.

Memorandum of Settlement ziahna hun hi Pu PC Lalduhthlanga, Joint Secretary, Home Department, Government of Mizoramin a kaihruai a. Rev. Langhmingthang Joute, Presbytery Superintendent, EFCI, Sakawrdaiin hunserh a hmang a. Pu Stephen Lalrinawma, Sr. Superintendent of Police, CID (SB) chuan report pein, Pu Lalmuanpuia Punte, MLA, Adviser to Chief Minister, Mizoram (Political), Pu David Lalthantluanga, IAS, Secretary, Home Department leh Pu Lalhmingthanga Sanate, President, Hmar People’s Convention- Democratic (Lalhmingthanga Sanate’s Faction)te chuan thu an sawi bawk a ni. Pu Gilbert Lalhlimpuia, SDO (Civil), Sakawrdaiin lawmthu sawiin Memorandum of Settlement ziahna hun hi a khar a ni.

Memorandum of Settlement ziahna hun hi Dr. Chaltonlien Amo, ex-MLA, Manipur, Sinlung Hills Council Member-te, Village Council Sakawrdai member-te, YMA Tuisual Group hruaitute, Joint YMA Sakawrdai hruaitute, Hmar Inpui (Mizoram Region) hruaitute, Hmar Students' Association hruaitute bakah Mizoram Sorkar Official te’n an hmanpui a ni.

Ruahman lawk dan chuan Hmar People’s Convention-Democratic (Lalhmingthanga Sanate’s Faction) mi leh sa 43 (sawmli leh pathum) te tan Mizoram Sorkar chuan April ni 30, 2026 (Ningani) hian CTI, Sesawng-ah Laying of Arms Ceremony (silai tun inkhawm) a buatsaih dawn a ni.