Mizoram le Pu Lalhmingthang Sanate keihruoi HPC(D) chun April 14 ah inremna thuthlung ziek an tum

Aizawl, April 7, Virthli (ONP): Mizoram sawrkar chun Pu Lalhmingthang Sanate keihruoi Hmar People’s Convention (Democratic) (HPC(D) pawl leh inremna thuthlung chu hungtlung ding April 14 hin Sakawrdai khuoah ziekpui a tum. 

Rep. Image

State Home Department official-ha'n an hril dân chun, sawrkar tieng aiawin Home Secretary-in thuthlung hi sign a ta, HPC(D) aiawin President Pu Lalhmingthang Sanate-in sign vêng a tih. Hi thuthlung ziekna a hin Chief Minister Adviser (Political) Pu Lalmuanpuia Punte khawm a ṭhang dinga hril a nih.

Hi hun a hin HPC(D) cadre 43 hai chu inhlan (surrender) bawk an ta, an ralthuom an siethlak hnunga rehabilitation programme dang dang ah thun ning an tih.

He inremna thuthlung hi Aizawl-ah sawrkar tieng le HPC(D) palai, inbiekna nei huna rêltlâng a ni a, hi inbiekna hi Pu Punte office-a buotsai a nih.

Pu Lalhmingthang Sanate pawl hin inbiekna-ah political demand hran an ngên naw thu hril a ni a, settlement hin development tieng pang, abîktakin Sinlung Hills Council (SHC) area-ah lampui (road le connectivity) siemthatna ding tieng pang an âwn bîk bâkah cadre hai rehabilitation, ngâidamna le ralthuom an in surrender pui hai Ministry of Home Affairs dân dungzuia compensation ti hai a nih.