Pherzawl, December 11, 2025, Virthli (ONP): Zani Mimtukthla 10, 2025 khan Hmar National Union General GHQ huoihawtnain Pherzawl ah General Assembly vawi 59-na hmang a nih. Hi huna hin khaw hran hran a'nthawk Palai mi 100 bawr fêkhâwm a nih. First Session ah HNU General Secretary a'nthawk HNU histawri, ṭhuoitu hmasa hai le a fe pei dân report ngaithlâk a ni a, HNU General President a'nthawkin HNU in Hmar hnam ta dinga hmâ a lâk dân hai, state pakhat a chau nilovin hieng Manipur, Assam, Mizoram le state dang dang a hai sawrkar chellai hai inbiekpui hlak a ni thu palai fêkhâwm hai lai report a pêk a. Hmar hnam ta dinga State hran hrana VVIPs hai, Central a Home Minister le Prime Minister hai khawm indâwrpui an ni hlak thu a hril a, zohnathlak hai laia HNAM le HNAM buoi lai khawma inremna siemtu ( Peace maker) ah HNU hi a lo ṭhang ta hlak thu hai a hril. Hieng hai baka hin SOO group han sawrkar le inremna thuthlung an ziek theina dingin HNU hin hma nasa takin a lak ta hlak thu, Mizoram a khawm Congress sawrkar lai inremna thuthlung ziek ani thu hai felfai takin report a pêk.
General Assembly a hin Hmar hnam ta dinga Pherzawl district hma sâwn dân ding, Hmar politics ṭha taka a fê pei thei dân ding le hnam ta dinga thu pawimaw tak tak business session ah rêl a nih. Resolutions pariet lai zet palai fekhawm haiin an passed a nih.
Hi huna hin kum 5 sûnga HNU General Headquarters a Office Bearer ding hai thlangna nei a ni hma in Presiding Chairman Pastor Lalronghak in Deuteronomy bung 1;13 tiemna a nei a, Pherzawl a Pastor hai inrâwina hnuoia palai fêkhawm haiin thuoitu ding thlangna an nei a, an ni hai hi thlang tling an nih.
General President: Dr. Chaltonlien Amo.
Vice President: Pu Lalhrillien, Pu Danielthang, Pu Rothang Hmar.
General Secretary: Pu Lalramsan Sungte.
Jt.Secy: Pu Lalthlamuong Keivom, Pu Chalrosung Hmar, Pu Chongsuokthang,
Finance Secy: John Ringsan.
Treasurer: Pu Ramsangthang Infimate.
Information secy: Som Hrangngul, Lalthavel Lungṭau, Lalhmasawn
Chairman EWC - Pu L. Thanzam Pulamte,
Vice~Chairman - Pu Lalringum Inbuon.
HNU General Hqtrs ṭhuoitu dinga thlang thara umhai Oath taking ceremony le ṭawngtaipêkna Pastor Lalziding in a nei zoin. Pu Lalhmangpui Fimate Former EM/ADCC in lawmthu hrilna a neia, Pastor Thangbieksang in hunbkhar ṭawngtaina a nei zoin, palai fêkhawm haiin ruoi an kil tlâng a nih.
Vawisûn Mimtukthla 11, 2025 hin Pherzawl District puong a ni a'nthawka kum 10 a tling champha lâwmna ropui taka hmang mêk a ni a. Pherzawl District Development Committee (PDDC) chun Hmar mipuihai a tam thei ang taka Pherzawl hmuna ṭhang seng dingin media fethlengin an fiel bawk a nih. Hi huna hin mipui fê khawm hai fâk ding Siel khawm that ning a tih. Zân huna CONCERT buotsai ning a ta, hlasakthiem mizoram a'nthawkin Zaizaii Faiheng le hlasak thiem dang dang haiin rimawi hmangin mipui fê khâwm hai inâwi an tih.
