Pherzawl: Liemtah December 10, 2025-a Pherzawl District Headquarters-a 59th Hmar National Union (HNU) General Assembly, 2025 chun, hun iemanichena inthawk Hmar Inpui (HI) Affiliated member nia lo fe ta chu, ram le hnam ta dinga sin tamlem a thaw theina ding beiseiin, HNU chu Hmar Inpui-a Affiliated member a nina chu suok dawk in, tuta inthawk chu Hmar Inpui leh inhrepaw zing-a fe lem nita sien tiin lungruol takin thutlukna an siem.
Chun, “State hran hran-a Hmar haiin Political Party a nei hai, HNU Assam, HPU North Cachar le HPC Mizoram hai chu HNU Gen. HQrts huoituhaiin inrawntlangna / inhrietpawna ṭha tak neipui ngei sien,” tiin HNU Assembly chun a rel a.
HNU Constitution Chapter 7, Clause 7.7 siem danglamin, Executive Working Committee Vice-Chairman post siem nita sien tia rawtna um chu ṭha tiin suktluk a ni a.
HNU Block No. 1 sunga um khuo hieng - Pherzawl, Tinsuong, Damdiei, Talan, Serhmun, Leisen le Thanlon- ha’n Block hran an hnina chu remtiin, HNU Block No. 8-na ti ning an ta, an headquarters ding Pherzawl ning a tih.
Assembly sung hin Block tin haia inthawk report le presidential address ngaiṭhlak a ni bawk. Thuoitu thar thlang hai chu a hma khan insuo ta leiin ei hung insuo nawn tanaw a nih. (HT)
