New Delhi / Imphal, (HT): Sawrkar thlungpui chun May 3, 2023 a inthawk Manipur-a tharum insuona le hnam buoina lo in an chungchang suichiengtu dinga a’n din Commission of Inquiry in an suizuina report an peklut hun ding chu May 20, 2026 chena dingin a suksei nawk.
Hi le inzawma Union Home Ministry in December 16, 2025 (Thawleni)-a gazette notification an suo a chun, Commission chun an suizuina report an rang thei angin sawrkar thlungpui kuomah an peklut ding a ni a, May 20, 2026 neka inhnu loin an peklut ding a nih tiin an ziek.
Commission hi June 4, 2024 a kha indin a ni a. May, 2023-a inthawk Manipur-a tharyum insuona le buoina suok an nasan; tharum insuona in nghawng a nei dan hai chieng takin an suizui dinga ti a ni a. Commission inrawitu chu Gauhati High Court Chief Justice hlui, Justice (retd.) Ajay Lamba a ni a; members hai chu IAS Officer pension tah Himanshu Shekhar Das le IPS Officer pension tah Aloka Prabhakar hai an ni.
Thla 30 liemta sung khan report an peklut thei ding hun hi vawi tam suksei a nita a; tuta ṭum hi suksei vawi 5-na nitain ei thu lakna chun a hril.
Hieng laizing hin tulai hnai iemanichen-a inthawk khan Manipur buoi leia phaimi ṭhenkhat raltlan hai chu buoina chingfel la ninaw sienkhawm an chengnain haiah an kir nawk tawl mek.
Thawanni khawm khan Manipur phaimi (Meitei), Imphal tienga raltlan (Internally Displaced Persons – IDPs), relief camp hran hrana um mi 389 vel hai chu Bishnupur district-a an chengnain haiah an kir nawk niin ei thu dawngna chun a hril.
IDPs kir nawk hai hi Phoungakchao Ikhai Mamang Leikai, Haotak, Haotak Tampak, Khoijumantabi le hmun dang dang hai an nih. Phoungakchao Ikhai area hi May 3, 2025 a buoina tlung hnunga inthawk hun tam taka inbeituona hmun pakhat ve a nih.
Buoina a re tah anga ngai a phaimi IDPs ṭhenkhat an kir nawk mek lai hin, Thawleni zan khan Bishnupur district sung, Torbung le Phoungakchao Ikhai area haiah silai nasa taka an ri leiin hi lai area-a cheng hai le IDPs kir nawk mek hai chu an ṭhathawng in a sukthlabar hle.
Silai hi ienganga hmetpuok a ni am chieng takin ei hriet naw a; hi thu ei ziek chena hin chanchin ngaichang zing a nih.
