~ Dr. Vanlallien Pulamte
North East India General Mission (NEIGM) buoina leiin Pastor Thanngur le a rawihai chun inkhâwmna ding Tinsuong khuoah Biekin an nei ta nawh a. Mission sin a chel ta nawh a, lo neia fâkzawng a ṭul tah leiin kum 1933 khan Tinsuong a inthawkin Phulpui ah an inpêm a.Hieng hun lai hin Phulpui ah Pathien thu awilo tamtak an la um leiin rawngbâwl a nuomsa leia inpêm an nih bawk.
Kum 10 Phulpuiah an um sung hin Pathien rawng nasatakin a bâwl a.A rawngbâwlna a hlâwk hle leiin Vangai Tlâng dungah ringtu an pung hrat hle.Hieng hun lai hin Vangai Tlâng ep Mizoram tieng khawm ringnawtu an la tam leiin ram a la'n thim hle a.Phulpui a inthawk hin Pathien thu hrilin Tuiruong vadung kânin Mizoram ah a lût rawp hlak a.Vawikhat chu Pathien thu hrila Phulpui a inthawka Mizoram a fe ding ṭumin Tuiruong a lo lien hle leiin a kâi thei nawh a. A beidawngin Pathien kuomah a ṭawngṭaia, a ṭawngṭai zo a "Amen a hang ti chun Mizoram tieng a lo um dai" an tih. Hieng khawpa Pathien mi hmang le hrietfûk Hmar haiin ei lo nei hi a ropuiin suong a um cher cher hlein ka hriet.Keichun Ringnaa Hmar hai Abraham ti’n Pastor Thangngur hi ka ko a nih. Kum 10 sung (1933-1943) a lo chêngna le khawsakna Inhmun ngeiah ka hang ngir chu ngaituona a suksei rum rum hle el.
Ka lungril a tâwk em leiin Phulpuia an um laia a hlaphuok pakhat hei târlang ka tih.Favâng ṭâm lai biel a fang a, a biel fang hung tlung chu Nisa lum lai hun a ni leiin sâwl le phing ṭâma chau êmêmin in a hung lût a. A mansanpui ṭuongah ân nghat chawta, iengkhawm a hril hma chun a nuhmeiin, “Lalthang pa tuta ṭuma i biel fang chu i thang sâwta i hung intak deu a nih ie.En ta, zanbu suong ding ei nei naw leiin bu khawm ka la suong nawh a, ei venghai ka I ngam deuhai bu suong ding hniin ka sir kuol vela chu, a mi pe thei an um nawh,” a lo ti a. Pastor Thangngur chun, “Lalthang nu thingpui sen bêk I nei naw maw?” a ti a. A nuhmei chun thingpui sen a thlit pêk a.Châwrkawt bula ṭhungin thli dawng malamin a dâwn a. Chulaitak chun hi hla hi a phuok a nih;
Nang Ngei Isu Nei Tlak I Nih
I aw Lalpa, I malsawmna hlu chu,
Nang nekin tamtakain an ngaihlu lem;
Tlaksam leia mitthli a hnai lai khawm’
I ram le I felna min hlat naw la.
Nang ngei Isu ka nei che chun,
Ieng dang am ngai ka ta maw Lalpa,
Iengkima ka iengkim I nih.
Tulaia eini rawngbawltu inti hai hin ei rawngbawlnaah hin harsatna tamtak ei tuok ve ngei ka ringa. Pastor Thangngur rawngbawl hun lai hin khuo le khuo inkâr lam infepawna um mumal lo, invawt le thilhring misukna thei tamtak kara ke a lâwn hlak a ni leiin ngaituona a suksei ngei. Harsatna hi Lal hmêl hmuna a lo ni zie Pastor Thangngur nuna inthawk hin hriet theiin a um. 'Tlâksam leia mitthli a hnai lai khawm, I ram le felna min hlat naw la' ti hla a phuokna hmun ding awma thunga lungrila tawngtaina neia hun ka hmang lai chun ngaituona a suksei hle.Hi hmun ngeiah hin Kristmas hla tamtak a phuoka.Pastor Thangngur chanchina inthawk ngawt khawm hin Pathien hi a um ngei a nih zie a chieng hle. Vangai Tlâng Phulpui khuoa inthawka ringna mita chieng le fie em em a Bethlehem le Kalvari a hmu el dam hi, Pathien a um ngei a nih ti sukchiengtu a nih. Khang hun lai khan internet hming khawm Khawvela hin a la um nawh a, lekhabu tha tiem ding hlak nei lo, khuo le khuo infepawna lam tak ngiel khawm la um mumal lo laia, 'Vân a tietve'n an khawia, Damna thu hrilna dingin' ti hla a lo phuok dam hi an ril hle a nih. Khang hun lai khan lekhabu tiem ding hlak la um lo, Baibul an neisun hlak Lusei Baibul.
Khawvel um sunga ringtu Kristien hai lai Abrahm, Mosie le Tirko Pawla hai hming a re tah naw ding ang hin Hmar hai lai hin Pastor Thangngur hming hi re tah ngai naw nih.
