Tuiṭhaphai, September 16 (HT): September 14, 2025 (Pathienni) zan dar 12:20 vel khan Dorcas Road, CCPur-a Mr Calvin H, Secretary External, Kuki National Organisation (KNO) chengnain chu hmelhrietlo han an raw a. ṬHelmit hman loin a kângral vawng. Fire Brigade khawm ko an ni a, sienkhawm meichawk hi a hrat leiin an ṭhelmit hne ta chuongnaw leiin in hi a kangral vawng a nih.
Dorcas veng hai hril danin, hmelhreitlo ṭhenkhatin zantieng dar 8 vel khan Calvin H, s/o (L) Rev. Dr G. Hatlang in hi petrol bombs 4 in an deng a. Amiruokchu ṭhenum-khawveng han petrol bomb dengpuok ani thu an hriet charin an hnawtzui nghal leiin an ṭhelmit thei a nih.
Thil tlung huna hin Calvin H le a sunghai chu an in-ah an um naw a. Grace Bible College a kai student pakhatin a hluo a ni a. Hiengang thil tlung lei hin ṭitthawngna leiin Grace Bible College campus tieng an sawndawk a.
Petrol bomb dengpuok a ni a inthawk darkar 4 hnung, zan dar 12 vel khan hmelhrietlo han a raw in an raw ta a nih. Petrol bomb dengpuok a ni hnung in Police le Sipai hai khawm a hmunah fein an enfel a. An maksan hnunga in hi an hang raw a ni a. Mihriem thi le hliemna tuok ruok chu an um nawh.
Liemtah September 4, 2025 zân dar 10:20 vel khawm khan hmelhrietlo han Calvin H. chengnain hi petrol bomb in an lo hang deng ta a. Sienkhawm a hmutu an um hman leiin kangmei lientham suok loa ṭhelmit a lo nita bawk a nih. Calvin H. chengnain raw a ni thua hin tu pawl khawm an la’n puong naw a. Police han thubuoi zieklutin an suizui mek.
Young Paite Association (YPA) New Lamka Block chun thil tlung hi an dem thu an puong a. Hiengang thil hi tuta hnung an block sungah tlung nawk tanaw sien an nuom thu September 15, 2025 khan an puong a. Mrs Niankhoching, w/o (L) G. Hatlang le a sunghai chu Pathien in thlamuon dinga ditsakna an inhlan.
