Silchar: August 29, 2025: Dr.Abhijit Nath, Academic Registrar, Gurucharan University, Silchar in Order an suo ang dungzuiin officially in Hmar MIL Coordinator ruot a nih a, Guest Faculty Hmar MIL post create in sanction nghal a nih bawk.
G.C.College, Silchar ah hin Hmar MIL subject kum 2008 a inthawk khan inchûk ṭan a nih a. Sawrkâra inthawkin Hmar MIL inchûktirtu hlaw ding sanction a ni thei el naw leiin, kum 2016 a inthawk khan kum 9 sung zet Dr.Vanlallien Pulamte in hlaw bovin mawphurna la in a lo inchûktir char char a. Assam sawrkâr kuomah Cachar-a college pathum G.C.College, Silchar, Cachar College, Silchar le Nehru College, Pailapool haiah Assistant Professor Hmar MIL post siem dingin nawr zing a nih a. Assam sawrkarin sanction dinga file process a thaw mêk laiin G.C.College, Silchar chu University ah hlângkai a nih tah leiin Vice Chancellor, G.C. University kuomah Hmar MIL subject Guest Faculty post sanction thawa appointment pe dingin Dr.Vanlallien Pulamte in hnina August 1, 2025 khan a pek a. G.C. University a thuneitu hai inṭhungkhawmin ngaituona an nei a. Nguntaka ngaituona le study an neinaah chun Hmar MIL Course Coordinator le Guest Faculty Hmar MIL subject appointment pe dingin thu sukthluk a nih.
Dr.Abhijit Nath, Academic Registrar, G.C. University, Silchar in File No.GUAR/2025-26/HMAR, Dated 20/08/2025 hmanga Order an suo ang dungzuiin Dr.Vanlallien Pulamte chu Course Coordinator (Hmar) dingin ruot a nih. Order in a ziek dan angin Guest Faculty, Hmar MIL subject, G.C. University ding chu Course Coordinator (Hmar) in suggestion le recommend a thaw candidate chu appointment pek ning a tih.Hlaw (salary) hi G.C.University fund a inthawk pêk a ni ding a nih.
Assam rama hin University pahni, Assam University, Silchar le G.C.University, Silchar haiah hin Hmar MIL subject ei inchûk thei tah a. G.C.University a Guest Faculty, Hmar MIL post siema sanction a ni el tah hi Khawvela Hmar nauhai ta dinga mêllung pawimaw, Hmar history a inchiktlâk a nih. G.C.University-ah hin Assam rama ṭaibal ṭawng inchûk mêk, a um sun chu HMAR ṬAWNG char hi a nih.
