Pawl inṭhuoi dan angin HPC (D), Manipur Region in Pu L. Sanga Hmar ralna an nei

Tuiṭhaphai/Lamka, May 31, 2025, Virthli (ONP): May 22, 2025 a damnawna leia Delhi hmun a fam chang, Ex-Chairman, Spokesperson, Hmar People’s Convention (Democratic)/HPC (D), Manipur Region/UPF le SoO group JMG Member, May 26, 2025-a a  chengna le an sungkuo inlalna khuo Thingchom, Tuiṭhaphai ah ropui taka vuiliema lo um tah, (L) Pu S. Lalthansang Pulamte @L. Sanga Hmar chu May 31, 2025 zantieng khan a chengna in ah HPC (D), Manipur Region/UPF in an pawl lo inṭhuoi dan angin ralna hunser (Condolence Service) an nei a, hnam sunga pawl tum tum a ṭhuoitu haiin an ṭawiawm.

Hi hun hi an pawl Secretary Pu Isaak Hmar in a keiṭhuoi a, Upa Thangdolien in hun hawng ṭawngṭaina a nei a, an pawl C-in-C Pu Joshua Hmar in thuhmaṭhuoi hrilna hun neiin, thlamuongna thucha le ṭawngṭai pekna hun Pastor Rohuol in a nei a, Pi Roselyn Lalumpui le Pu Lalthangkung F. Tusing (Kanghling Father) ha'n hla sakin an in-awi a, HPC (D), Manipur Region; ZRA/ZRO-UPF, Hmar Inpui-General Headquarters, Hmar Students' Association-General Headquarters, Hmar Returnees' Association le inneitu (Pu L. Sanga Hmar a sung hai) a inthawk thuhril ngaithlak niin lawmthu hrilna pawl ai-awin Pu Laldemlo, PRO, HPC (D), Manipur Region in a nei a, hun khar ṭawngṭaina le ralna ruoi ṭawngṭaia inhlanna Upa Lalruot in a nei zoin ralna ruoi kiltlang a nih.

Hi hun a thu hrilna hun nei hai chun Pu L. Sanga Hmar lo inpekzona hai hrilin, ngaisang a umna hai a vel a velin an hril a, hnam ta dinga ṭhangruol a pawimaw zie le hma tieng ah ṭhangruol dingin fielna an siem a, a sung hai khawmin HPC (D), Manipur Region in hi ang hun an buotsai chu lawmthu an hril.

ZRA/ZRO-UPF chun anni laia ṭhang ang char le danglamna um der loa Pu L. Sanga Hmar a ruong chung ah inzana insangtak le chawimawina an lo pek tah khan an ngainat zie le HPC (D), Manipur Region chu UPF ah an thaw tlangpui hai khawm an ni angin hma tienga khawm inpaw taka a ṭul anga hma lak tlangpui pei an nuom thu hai an hril.

HPC (D), Manipur Region khawmin an ṭhuoitu Pu L. Sanga Hmar chu fam lo chang tah-in hi ang hunser an hmang chu a tawpna a ni naw ding thu le a thil thaw ṭhaṭ hai hrie zingin an hung sunzawm pei ding thu le an thei ang angin a maksan a sunghai khawm an la ngaisak pei ding thu hai an hril bawk.