Sakawrdai, Sinlung Hills, April 23, 2025: Hmar Inpui The 10th Executive Council chu Sakawrdai, Sinlung Hills, Mizoram ah April 23, 2025 10 AM-3:30 PM khan Sakawrdai Community Hall ah nei a nih. Hi hun a hin palai 58 an ṭhang. Chu hai chu Assembly Secretariat Officers', General Headquarters Office Bearers'/Executive Committee, General Headquarters Sub-Committee: Political Affairs Committee, Finance Committee le Advisers, Hmar Inpui General Headquarters Affiliated body- Hmar Youth Association (HYA), Hmar Christian Leaders' Forum (HCLF), Hmar Art & Culture Society (HACS), Hmar Artists' Association (HAA), Hmar National Union (HNU), Hmar Women Association (HWA), Hmar Students' Association (HSA), Hmar Inpui- Mizoram Region, Vangai Region, Hmarbiel Region, Jiribam Region, Meghalaya Region, Assam Hills Region, Tuiṭhaphai Region, Imphal Region, Barak Valley Region le Guwahati Region haia inthawk an nih.
Hi hun a hin Agenda 21 lai chipchier taka ngaituo le hriltlang a ni hnungin thutlukna (resolutions) 10 felfai taka siem zui a nih. Hmar Inpui Constitution dungzuiin The 10th Executive Council thutlukna (resolutions) hai hi The 14th General Assembly April 24, 2025 ah pawmpuina a la ngai ding a nih.
Hmar Inpui 10th Executive Council a hin Moderator in Assembly Speaker Rev. Rohminglien Pakhuongte a ṭhang a, hun hmasa tieng ah Rev. Joseph L. Khawbung, Presbytery Secretary, Independent Church of India (ICI) in devotion hun hmangin Bible tiemna le ṭawngṭaina a nei a, sakhuona tieng ah ṭhuoitu haiin an suksuol pha pha Pathien-in a maksan hlak thu, kohran, hnam le khawtlangin Pathien rawl hriet le ngaiven a pawimaw thu, Pathien rawl hriet naw chun hnam ṭhuoitu khawm ni sien mi thaw dan dana thaw a ni hlak thu hai a hril. Assembly Secretary Upa R. Tawna Khawbung in inhmelhriettirna le hminglamna neiin Constitution dungzuia ro rel thei a ni thu a puong zoin Business Session hi nei a nih.
Business Session hun a hin Hmar Inpui Constitution Revised and Enlarged entlangna khawm nei niin Mizoram Region-in palai hai hi lawmna ruoi siem peka zantieng bu an fakpuina chungthu ah Assembly Secretariat aiaw'n Assembly Speaker le Moderator Rev. Rohminglien Pakhuongte-in lawmthu a hril a, closing prayer Pastor Solomon Inbuon, RPC NEI Circle Pastor in a nei bawk.
April 24, 2025 a Hmar Inpui 14th General Assembly -cum- Election 2025-2028 nei zoah mipui ngaiven tak Assembly thurel le ṭhuoitu thar ding hai chu tlangzar le hriet thei a hung ni ding a nih. Assembly palai hai hi Hmar Inpui General Headquarters khawmin zantieng ruoi siemin bu faktlangpuina an nei ding nih.
-LRS Puruolte
