Responsive Ad Slot

ROLUNG' ti lekhabu, Piani Hmar ziek tlângzar

Saturday, January 25, 2025

/ Published by VIRTHLI
Tuiṭhaphai: Sinlung Academy of Letters (SAL) in a published, 'ROLUNG' ti lekhabu, Piani Hmar ziek chu January 25, 2025 sun dar 1-4 PM khan RWUS Training Hall, Behind lCI Gospel Centenary Building, Sielmat, Tuiṭhaphai ah tlângzarna hunser phuisui tak buotsaiin mitin inchawk le tiem thei dinga tlângzar a nih. Hi hun hi mi pawimaw tak tak fiel a um haiin an ṭawiawm ṭha hle a. Hmar Artiste inlar Mercy Lalumpui, Lily Ramthar Keivom le Zomuanpuia (Mizoram) haiin hla mawi le ṭha tak tak sakin an in-awi bawk.

Piani Hmar hi a pieng le seilienna Mizoram niin 'Zialtu Zûn Zâi' ti lekhabu Lusei/Duhlian ṭawng khawmin a lo ziek tah a, 'ROLUNG' Hmar ṭawng hi a ziek lekhabu pahnina a nih. 

Ni kum, March 11-16, 2024 khan Literature inkhawmpui lien Rabindra Bhavan Lawns, New Delhi ah World's Largest Literature Festival nei a ni hun a khawm ṭhang vein Hmar ṭawng ngeiin Hmar poem tiem suokna a lo nei tah a nih.  
Ama hi Hmar Students' Association, Joint Headquarter Aizawl, Excutive Member; Hmar Inpui Mizoram Region, Excutive Member; Mizoram Hmar Coordination Committee, Excutive Member; Mizo Academy of Letters le Mizo Poetry Association member khawm a ni bawk.

Tlângzarna hunser a hin Dr. David Buhril Secretary, SAL in hun a vawng a, hun hmasa tieng ah fe khawm haiin 'Kan Tlângram Mawi' ti hla sakin ṭawngṭaia hun hawngna Rev. Vanlalhlun Traite in a nei zoin thufun hrilna Dr. L. Fimate Chairman, SAL in a nei a, Piani Hmar thukhawchâng hrilna Jerry Pulamte in a nei a, ROLUNG Thlîrlawkna Dr. Lalṭanlien Khobung in a nei a, ROLUNG tlângzarna Dr. Lal Dena in a nei a, tlângzartu thuhrilnain a zui a, chu zoin thuhrilna Piani Hmar, ROLUNG ti lekhabu ziektu; Lallungawi, Secretary, Hmar Writers Club le Rev. Ros Infimate, President, Hmar Inpui, General Headquarters in an nei a, John Ruolngul, Vice Chairman, SAL in lawmthu a hril zoin ṭawngṭaia hun kharna Rev. Joseph R. Joute in a nei a nih.

Tlângzarna hun a hin 100 Copies SAL in an inchawk a, 50 Copies HI-GHQ in an inchawk bawk. Hi hun a lekhabu inchawtu le ama ngaisangtu haiin Piani Hmar hi a hming an lekhabu inchawk ah an inziektir tawl a, ngainatu a hau hle a nih. Chawimawinain Hmar Inpui General Headquarters chun chawimawina puon insiltirna an nei bawk.

Hi hun a hin a thu ziek hai tiem inhawi zie, Piani Hmar a tumruna ngaisang um le entawn tlak a nina hai an hril tawl bakah ama ngei khawmin a pangngai ngawt/ṭhanghlui hai ziek el ni loin ṭhangthar hai khawmin lekhabu ziek uor a pawimaw thu a hril a, ei hnam thu-le-hla (literature) sukhausakna dingin huoisen takin ziek ngam a pawimaw thu hrilin ṭhangthar hai chona a pek a, SAL khawmin ṭhangpui tlak hai chu lekhabu an sut (publish) pek nuom thu an hrillang bawk.

Tuiṭhaphai laia chu ROLUNG lekhabu hi HSA-JHQ Tuiṭhaphai Office, HSA Campus, Rengkai a inchawk thei ning a t'a, Shillong, Guwahati, Hmarkhawlien, Saiphai, Saipum, Vairengte, Kolasib, Sakawrdai le hmun dang dang a khawm a dit hai kuomah zawr suok vat ning a tih. A man hi ₹ 200/- ding a nih. Thu chieng hrie nuom hai chun Contact no. +91 87319 91922 (Call/WhatsApp) ah lekhabu ziektu biekpaw thei ning a tih.

Don't Miss
© all rights reserved
made with by Simon L Infimate