CCpur, January 26, 2025, (Virthli ONP): 76th Republic Day le inzawma sipai huoisen lâwmman dawngtu ding India President in mi 93 thlangdawka umhai hming a puonghai lai Hmar pasalṭha Pu Jeffrey Hmingchullo, S/o Lalkhawthang & Vanlalmuoni, Vengthlang, Rengkai, CCpur chu a ṭhang.
Pu Jeffrey Hmingchullo hi CRPF ah Inspector niin tukuma Shaurya Chakra, India rama huoisen lâwmman/châwimâwina insâng hai lâia a pathumna dawngtu ding mi 14 an thlangdawk hai lai a ṭhang ve a nih. Pu Jeffrey hi kum 2023 a Jharkhand ah helpâwl Maoist hai leh nâsatakin an inkâp a, huoisen taka che in Maoist 2 an kâphlumna le inzawma châwimâwina hi inhlân a nih. Tuhin Pu Jeffrey hi 203 CoBRA Bn.a posting mêk a nih.