Guwahati, April 13, 2023, Virthli (ONP):
Ni 12, Thlatûn, 2023 khan Hmar Inpui GHQ hma lâkna hnuoiah Hmar Welfare Society, Guwahati chun Hmar ṭawng seminar a huoihawt a. Hmar hnam sûngâ pâwl palâi hung intirhâi chu Hmar Inpui GHQ, HLS Assam, HLS Manipur, HLS Mizoram, HLS Meghalaya, HSA General Headquarters, Hmar Bible Translation Committee, Hmar Christian Leaders' Forum le Hmar Christian Musical Society an nih. Chû bâkah mi mal fiel sâ bawk an ni a. Chuong hâi chu Prof. Lallukhum Fimate, Dr. Marina Laltlinzo Infimate (Linguist), Rev. Kawlthanglien Infimate hâi bâkah Guwahati khawpui lê a sê vêlâ Hmar ṭawng ngâina tak tak hâi infuon khâwmin Seminar a ni khatna chu hmang a nih.
Hun hmasa takah seminar hawngna hunser Tv. Eric L. Ralsun-in a keihruoi a. Literature meiser sit hmasatû & fam chang ta hâi hriet zingnain le inzâ inentirna dingin minit khat lungril ṭawngṭâina neiin Rev. Lalchawlthang Ṭhiek-in hun hawng tawngṭâiin a sunzawm. Lâwm lûtna lê inhmêl hrietna hun SOC secretary, Dr. Immanuel Tuolor-in a hmang â. Pu James Lalsandam Neingaite, Chairman Hmar Welfare Society, Guwahati chun palâi lê fiel bîk hung hâi a lâwm lût hnungin Pû Thanghlun Hmar, President, Hmar Inpui GHQ chun thupui hril hawngna hun a hmang. Thu kêuna hun SOC Chairman, Pu Joshua Neitham-in hun a hmang zoin châwl lâilâwk nei a nih.
Sâwng khatnâ-
Pu Philip Khoral-in palâi hung hâi thilpêk lê ngâihruina thu ziek mâwi inhlânna hun chu kêihruoi a. Pâwl hran hranâ palâi hung hâiin thu hrilna hun an nei. Hmar ṭawng ziek kawngah inthuruol a ngâi ziet lê hma thlîr nei a ṭûl zie dâm hrilin hun an hmang.
Sâwng hnînâ-
Rev. Kawlthanglien Infimate vilkhaltû (Moderator)-â ṭhangin, Apostrophe Assam HLS le Manipur HLS thlîrna tukver tî thupuia hmangin epsêlna (Debate) an nei. HLS Assam âi âwin Pu Lalrochan Sungte lê HLS, Manipur âi âwin Upa Lallungawi Hmar a ngîr. Inepsêl bâkah mipui khawm ngâi dân lê thlîr dân hrilna hun pêk an nih. Morphophonemics & Orthography thupui ṭhê nâwi hmangin Pu Elim Hmar-in chipchier takin a hril a. Richard Lalṭanpuia, GS, Hmar Inpui GHQ-in vilkhaltu sin a thâw bawk. Chun, Prof. Lallukhum Fimate-in Ṭ/Tr & aw 'âiin' 'O' hrilna hun lê indawnna hun hmang a nî zoin, hun indûthâw lê insit pumin a ni khat nî chu, zân dâr 9-in hmang zo a lo ni tah.
