Hmarkhawlien, December 11, 2022, Virthli (ONP): Hmar Students' Association (HSA) 58th General Assembly chu zani khan Fulertol Multi - Purpose Hall hmuna hlawtlingtakin an nei. Hripui hrileng le sietna dang dang tlung leiin 58th General Assembly hi a hun taka hmang thei ani naw baka tuta vel Assembly a hin rorelna chau neiin Palaihai chau an fekhawm a nih.
Hi General Assembly hi Assembly Affairs keihruoina hnuoia nei niin ro tamtak el an rel. Hun hmasatieng Pu L. Rothanglien Khawbung, President GHQ in Presidential Address a nei a, GHQ, JHQ, Branch le Unit chena HSA hmalakna a ram le building hieng - Vaitin HSA ram sukfel, HSA Assam Hills JHQ building thar nei le Vairengte IOC Unit ram le in project an nei thar hai thu hrilna a nei baka Inchukna tieng ahma neka ngaipawimaw zuol a, nasataka hma lak thar a pawimaw zie hai hrilin JHQ le Branch tin haiin GHQ le thawtlang ding proposal hai siema hma nasa nawk zuola la dingin a hril.
Chun, theina hmun hmuna haiah Competitive Coaching hai huoihawt nawk a, sin zawngna kawngah Central level chena inziekkai ei pung theina dinga hmalak le mipui kuomah khawm competitive exam thuhai le inchukna line dang dang hai hril uora awarness hai nasa nawk zuola nei dinga rawtna a siem.
January 2023-a Ruonglevaisuo Unau Suopui Festival pawimawna thu le hi festival hmang hin unau-suopui hai lai inlaichinna a suktha hle theina dinga beisei ani ang hrima ngaipawimaw ding le a tam thei ang tak HSA tieng khawm thang dingin fielna a siem bawk a nih.
Assembly huna hin ro tam tak an rel a, an ro rel thenkhat hai chu HSA GHQ hrietpuinaa, HSA Chennai le HSA Chandigarh lo indin a um chu hi Assembly hin Branch puitling ni dingin an pawm.
HSA Member inchuknaa thawtha zuol bik hai kuomah HSA GHQ in Meritorious Award pek ta dingin an rel baka Nu le Pa, mani nauhai enkawlna le abikin lekha inchukna tienga mi neka thahnemngai zuol bik le thaw nasa zuol bik hai le mani nauhai siem puitling kawnga entawntlaka um a hriet hai chu HSA GHQ in JHQ le Branch fethlengin Chawimawina pe ta dingin an rel bawk a nih.
Hi Assembly hin kumtak tak el lo thi tah Inchuklai Nun chu suksuok nawk ngei dingin an rel a, mawphurtu ding chu CEC kutah an sie a nih.
Hmar tawng suk hmasawnna ding le humhalna dingin kawng dang dangah hma lak tlang seng dingin an tia, hi le inzul hin kum 2023 Thupuong dingin HMAR TAWNG UOR ti chu an puong bawk a nih.
Assam le Mizoram ramri zula um Hmar khuo umhai chu khuo dang hai ang bawka hmasawnna an hmu ve theina dingin theitawpa hma lak dingin an rel.
Ro rel zo hin Hmarkhawlien Community Hall ah ruoi inhnik tak el an kiltlang a nih.
