Saikawt, May 9, 2022, Virthli (ONP): Hmar Martyrs’ Trophy Organising Board (HMARTOB) huoihawtna hnuoiah vawisûn May 9, 2022 dâr 1:30 p.m. khan Saikawt Playground-ah The 17th State Level Hmar Martyrs’ Football Trophy 2022 Semi Final Round Robin ṭan a nih.
Inkhêl ṭan a ni hmain hun inser suon hmang a ni a, Pu Lalvullien Hmar, Chairman, HMARTOB in lawmlûtna thucha a hril a, Mr. Lallienkhum Traite, Secretary, HMARTOB in Khuollienhai Chawimawina thuziek ‘Memento’ a'n hlan.
Hi huna hin Chief Guest in Dr. P.K Thomas, Chairman, Gilead Diagnostic & Health Care a ṭhang a, Guest of Honour le Functional President in Pu Judson Vanlalnghaklien, Proprietor, Khawbung Ware House le Pu Lalringum Inbuon, Founder & Chairman, The Manipur Agro & Sinlung Organic FPC Ltd. hai an ṭhang.
Hi huna Khuollienin thu a hrilna a chun Hmar pasalṭha hnam ta dinga martyr chang hai po po inzâna insângtak a pêk thu a hril a. Hnam ta dinga an hringna chen inhlântu hnam pasalṭha hai hriet zingna dinga HMARTOB in Hmar Martyrs' Football Trophy a la huoihawt thei zing chu ropui a ti zie hrilin HMARTOB hai inpêkzona chu inpâkum a ti thu a hril.
Semi Final a hun inser suon a hin Nk. Mercy Lalumpui a'nthawk hnam hla mawi tak tak el ngaithlâk a ni a. Pu Lalhrietzing Famhoite, Vice-President, HMARTOB in vote of thanks a hril.
Chief Guest in Hmar Martyrs’ Trophy 2022 Semi Final round a kick off zoin Semi Final 1st Match inkhêl nghal a nih. Inkhêl entu mipui an ṭhahnem hle. 1st Semi Final Match a hin KPA Saikul chun an khingpui Symropia FC 4-1 in an hne. Man of the Match in Benjamin (17) KPA Saikul thlang a nih.
Hmar Martyrs' Trophy 2022 a hin Team 18 an ṭhang a. Semi Final kai hi team pathum (KPA Saikul, Symropia FC, Zodairûn FC) an um a. Semi Final hi Round Robin a ni ding a nih. Hieng Team pathum hai hi Semi Final round a hin inpêttuo seng an ta, points hmu insângtak team pahni ha'n May 16 hin Final Match an khêl ding a nih. May ni 11 hin dâr 2:30 p.m. in Symropia FC le Zodairûn FC inkhêl nawk an tih.
