Saikawt, April 19, 2022, Virthli (ONP): Hmar Martyrs’ Trophy Organising Board (HMARTOB) huoihawtna hnuoiah vawisûn (April 19, 2022) khan Saikawt Playground-ah The 17th State Level Hmar Martyrs’ Football Trophy-Cum-The 32nd Hmar Martyrs’ Day Observance 2022 Opening Ceremony puithu takin hmang a nih. Hun hmangna hi Nk. Grace Lalremsiem Sungte le Pu Ruolchunghnung Ruolngul han an keiṭhuoia, Rev. C. Lalthlunglien-in hun hawng ṭawngṭaina a nei zoin Chief Guest in Flag keipharna hunser a hmang.
Hi huna hin Pu Lalvullien Hmar, Chairman, HMARTOB in lawmlûtna thucha a hril a, Mr. Lallienkhum Traite, Secretary, HMARTOB in Khuollien hai Chawimawina thuziek ‘Memento’ a'n hlan.
Hi hunser hmang huna hin Chief Guest: Pu Zosanglur Joute, MCS, Assistant Commissioner, CCpur, Guest of Honour: Pi Lalrawngbawl Hmar, MCS, SDO, BDO, Samulamlan le Functional President: Pu H. Buonsanglien Inbuon, Deputy Manager, Punjab National Bank hai a’nthawk thu ṭha tak tak ngaithlâk a nih.
Opening Ceremony a hin Nk. Lalramchuon, Jenny Lalchhandami le Elizabeth Ramhlunmawi ha’n hnam hla mawi tak tak sakin mipui fe khawm hai an inâwi a. Muolvaiphei HYA Cultural Troupe han hnam lâm mawi tak el an pholang a. Pu Lalhrietzing Famhoite, Vice-President, HMARTOB in vote of thanks a hril.
Hi huna hin Hmar hnam ta dinga hringna hlu tak lo inhlantuhai po po inzâna suklangnain to ṭawka sûnna hunser hmang a ni a, Chief Guest in Hmar Martyrs’ Trophy 2022 a kick off zoin 1st Match inkhêl nghal a nih. First Match a hin North East Youngster Football School (NEYFS) han an khingpui ZEAL SC hai 1-0 in an hne. Hmar Martyrs’ Trophy 2022 hi Virthli (ONP) in photo coverage hung thawng a ta, www.virthli.in ah match result hai a remchang ang peiin hung update ning a tih. Hmar Martyrs' Trophy 2022 a hin Team 18 an ṭhang a nih.
