Muolhoi | 22.04.2022| Vawisun khan umni khamin Hmar Inpui Assam Hills Region chun Budget -cum- Annual Session hlawtling takin CH Khawthlang Hall, Muolhoi-ah a nei.
Hi huna hin Hmar Inpui thuoitu hai le a hnuoia Affiliated bodies hieng HWA, HYA, HSA, HPU, HPC(D), HLS, khuo tin anthawka Gaon Bura (Khuo Lal) hai, le hnam sunga mi pawimaw dang dang hai an thang.
Palai hai lawmlutna Pu Rosang Hrangchal, President HI, Assam Region in a nei a, inkhawm hi Vice President Upa Darrova Darngawn in a keithuoi a, Hmar Inpui Budget 2022-23 hi Pu Zokhawsiem Joute, Finance Secretary in pharlangna a nei a, Nuoi 23 surplus umlo Budget chu fekhawmhai hriet dingin chipchier takin hrilna a nei.
Affiliated Bodies iem ani zat hai anthawka an mamaw zat ding budget an siemhai chu a remchang dan anga siemrem hai tarlangna nei ani a, organisation tin hai hmang ding riruong hai, Inpui in pawimawna le tulna dang danga a hmang dan ding hai le sum lut dan ding hai chiphier taka hriltlang ani bawk.
Jinam Valley sunga hnamin harsatna a tuok chi dang dang hai chipchier taka hriltlang ani a, HPC(D) Assam Region hmalakna hai ngaithlak ani bawk a, chipchier taka hmadawm ding hai hriltlang ani bakah NCHIPF hmalakna hai ngaithlak niin hmalak dan ding pei hai hriltlang ani hungin hieng thu haia hin hmalak dan ding resolution lak a ni bawk.
Zantieng huna hin ruoi buotsaia um kiltlang ani bawk.
