Rengkai, April 4, 2022, Virthli (ONP): Independent Church of India Central Kristien Ṭhalai Pawl in "Krista hnung zuitu ṭha'' (Mk. 8:34) ti thupuia hmanga General Conference a vawi 38-na (April 1-3, 2022) hun sunga Rengkai, Tuiṭhaphai Presbytery a an nei chu April 3, 2022 zan khan a lo ṭumṭiek tah.
Conference hawngna April 1, 2022 zân Rev. Lalhmingthang, Executive Secretary, ICI in a nei a, hawngna hunser a hmang zoin KṬP Hlapui " Lal Iengkim Thawthei" ti hla ursunle khun tak a sak a nih. Conference hun sung hin Rev. L. Joshua, P/S, Hmarbiel South, Rev. Alan L. Ṭhiek, CKṬP Exe. Committee Members, Rev. Lalrohlu, Evangelist At-Large ICI le Rev. Lalneikhup Hmar, Secretary Ministries, ICI hai anthawkin Pathien thucha ropui tak tak el ngaithlâk a nih. Presbytery le Mission Field hrang hrang a'nthawka hung khâwm Palai han ro chi tum tum an rel bâka malzai le hlapawlpui inruolsiekna hai nei a nih.
April 3, 2022, Pathienni zân inkhawm hunah inkhawmpui sunga inruolsiekna chi tum tum a lawmman hai puong le sem a nih. Hlapawlpui inruolsiekna "Buonglienkung Music Award'' chu Jiribam Presbytery in an lâka, Trophy le Sumfai cheng ₹ 20,000 inhlan an ni a, Tuiṭhaphai Presbytery in a pahnina an lâk. Best Choir Conductor in Tv. Lalhmangai, Tuiṭhaphai Presbytery thlang a nih.
Solo Competition ''Rev. Thangngur Music Award 2022'' chu Hmarphei Presbytery a inthawk- Nk. Lalrinhlu Infimate (Sakawrdai) chu a thiemtak niin lâwmman sumfai cheng ₹ 20,000 le Chawimawina thilpek Rev. Lalngailien Joute, Rev. Thangngur a tupa in a'n hlân a, Tuiṭhaphai Presbytery a inthawk- Nk. Juanita Zoparmawi le Guwahati City Church a inthawk- Tv. Lallukhum Neitham ha'n a pahnina le a pathumna lawmman an dawng bawk a nih.
One Day for Christ (ODC) pe ṭha tak lawmman chu Lamphel ICI Ṭhalai hai inhlan an ni a, hi bak hin Talan, Delhi North le Thingkal Unit hai khawm lâwmman inhlan an nih. Guwahati City Church Ṭhalai hai chu Overall Activities lâwmman a pakhatna inhlan an ni bawk.
Program hmang a ni zoin KṬP Anthem "Lal Iengkim Thawthei'' sak a ni a, Rev. Lalneikhum, P/S, Tuiṭhaphai Presbytery in Conference khârna le malsawmna a hril zoin hun suktâwp a nih.
Inkhâwmpui hun sung hin Rev. Thangngur Music Awardee hai le ICI Central Choir han hla a rawngbawlna an nei a, North India Mission Field a Ṭhalai hai a'nthawk drama le special items hmu nuom um tak tak el en le ngaithlâk a nih.
