Sielmat, March 28, 2022, Virthli (ONP):Trinity College and Seminary (TCS) chun vawisûn dâr 11:00 a.m. khan Rev. Chawnga Memorial Chapel Sielmat, Churachandpur- ah "Scripture Guided Life" (2 Tim. 3:6) ti thupuia hmangin The 18th 19th & 20th Joint Convocation Ceremony hlim tlâng takin an hmang. Hun hmasa tieng "How Great Thou Art'' ti hla mipui pungkhâwm han an sak a , Pi Chongmuonpui, Senior Lecturer in Pathien thu tiemin ṭawngṭaina a nei a.
Rev. Jonathan Pudaite, Principal, TCS a'nthawkin Principal report ngaithlak a nih.
Hi huna hin Rev. V. Lalṭhalien Zote, Academic Dean, TCS in Graduate tharhai thilpêk inhlanna a nei a. Graduate thar hai Degree inhlanna Rev. John L. Pudaite, President TCS & BFTW in a nei a, convocation address a nei sunzawm nghâl bawk. Graduate thar hai ṭawngṭaipekna Rev. Rohminglien Pakhuongte, Vice President, PMS in a nei zoin Ms. Eunice L. Pudaite, M.Div a'nthawkin Response from Graduate ti thucha ngaithlak a nih.
Hun khâr ṭawngṭaina le Bendection Rev. Lallienvel Pakhuongte, President EFCI in a nei zoin hun suktâwp a nih.
Joint Convocation a hin Diploma in Theology ( Dip.Th) zo thar mi 16, Bachelor of Theology ( B.Th) mi 67 le Master of Divinity (M. Div.) zo thar mi 74 an um a, Degree inhlâna um hai hi an rengin mi 157 an nih.
Coronavirus hripui inleng leiin Convocation Service hi kum hni lai zet nei thei loin a um a, Academic Session (2020-2022) hun sûnga mi vawisun khan nei kawp vawng niin thu dawng a nih. Kum tin a Convocation huna inchuklai a thaw ṭha bik hai kuoma Individual Award chi 6 lai zet sema um hlak chu pandemic in harsatna chi tum tum an tlun leiin tuta vel hin sem ani naw thu dawng a nih.
Vawisuna Convocation Ceremony a hin Degree latu hai lâwmpuitu nu le pa, ṭhen le ruol tamtak an fê khawm a. Rev. Chawnga Chapel khawm mipui an sip hmur nghe nghe a nih.
