Parbung, August January 26, 2022, Virthli (ONP): Tipaimukh Sub- Division innghatna Parbung, IB tlângah vawitûk khan Repubulic Day a vawi 73-na ursûn takin hmang a nih. Hi huna hin Pu I. Dineshkumar Singh, SDO Parbung chu Khuollienin a ṭhang a, National Flag a kei phar zoin inzâ takin hi huna fê khawm ha'n National Anthem an sak.
Hi hunser hi Parbung Village Authority, Tipaimukh Sub-Division huom sûnga khawtlâng ṭhuoitu le Village Authority ha'n an uop a, Parbung SDO-in lâwmman chi tum tum semna le inhlânna a nei.
73rd Republic Day hi Pherzawl District huopin Pherzawl ADC Complex-ah vawisûn khan ursûn taka inser le hmang a nih. Hi huna hin Khuollien Pu Joseph Pauline Kamson, Pherzawl DC-in National Flag a kei phar a, National Anthem mipui fe khâwm ha'n inzâ takin an sak. Hi huna Khuollien Pherzawl DC-in thu a hrilna a chun, thil ropui tak a hung um ding chun lung inuoi taka nghâk a ngai a, Pherzawl District hi vawi khatin puitling el naw sien khawm, damtê'n a la hung puitling ding a ni a, nghâk fan fan ei tiu tiin a hril a, development sin thaw ding tam tak hma bâk a um ti ei inhmai naw a, sin thâw mêk ding khawm a la tam a, ei la thaw pei ding a nih tiin,' a hril.
Hi huna hin Pherzawl District-a sawrkâr department hran hrana sinthaw ṭha bîk hai kuomah Châwimâwina Thuziek inhlân an ni a. Inchûklai ha'n hnam lâm hmu nuom um tak tak an pholang a, march past an nei bawk a nih.
Vangai Range Sub-Division inghatna Patpuihmun khuoa khawm vawitûk khan ursûn takin Republic Day a vawi 73-na hi hmang a ni a, National Flag kei phar niin National Anthem sak a nih.
