Responsive Ad Slot

'HNAM RO' lekhabu tlângzârna le Music Award 2021 inhlânna hun hmang

Saturday, November 6, 2021

/ Published by VIRTHLI
Rengkai, November 6, 2021, Virthli (ONP): Vawisûn, November ni 6 dâr 11:30 AM khan Hmar Writers Club huoihawtna hnuoiah "Hnam Ro" lekhabu tlângzarna le Music Award 2021 inhlânna READS Auditorium (VTI), Muolhlûm, Rengkai-ah hmang a nih.
Hun hmangnaah Tv. V.K. Pangamte, Asst. Secy., Hmar Writers Club-in a keihruoi a, Rev. Dr. V. Lalnghakthang-in ṭawngtaia hun hawngna a nei zoin Pi Zosangkim Pudaite a'nthawkin lâwm lûtna thucha ngaithlâk a nih a, Pu L. Kiemlo Pulamte, President, Hmar Writers Club-in thu kêu hawngna a nei.

Hmar Writers Club Secretary le 'Hnam Ro' Editor- Pu Lallungawi-in lekhabu thlîr lâwkna a nei zoin Khuollien Dr. Chaltonlien Amo, Hon'ble MLA-in lekhabu a tlângzâr a, a lekhabu tlângzâr ' Hnam Ro' hi chêng sâng ngaa inchaw nghâlin thuhrilna neiin Hmar Writers Club-hai 'Hmar Pulpit Bible' a'n hlân. Hi huna Khuol Inzaum Pi Lalremsiem, Founder, Pray For The World Ministry chu a taksa ngei hung inlang thei naw sien khawm,  Upa Lallungawi-in a thucha tiemlangna a nei a, Pi Lalremsien chun Hmar Writers Club hai chu sumfai chêng nuoi khat-in a ṭhangpui ding thu a hril.

Hi huna hin Nk. Gladys Lalparzo Sanate chu Music Award 2021 (RIMÂWI LALNU) inhlàn a ni a, award hin trophy le sumfai chêng sîng khat (Rs.10,000/- a sawm. Hunser hmang a ni sûng hin ama inthawkin hun kâr lakah hlâ ngaithlâk a nih.

Lâwm thu hrilna Pu. L. Ruoivel Pangamte-in a nei zoin Rev. Dr. Lalhmuoklien-in hun khâr ṭawngṭaina a nei a, refreshment tuihnai tak el fâk le dâwn tlâng a nih.



Don't Miss
© all rights reserved
made with by Simon L Infimate