Rengkai/Muolhlûm, September 22, 2021, Virthli (ONP): Pathien châwimâwina le inpâkna hlapâwl rema an vânglai nia an râwl mâwina hai insuoa hmun hran hrana rawngbâwlna nei hlak, YouTube Channel fe thlenga inpâkna hla hring tak tak hung thurdawk hlaktu le mi tam tak ta dinga thlarau malsâwmna intlun rawp hlaktu, NPT Central Choir le Blessed Choir hai chun September ni 21, zân dâr 8:00 PM- 10:00 PM sûng khan Vision Turf Ground, Rengkai, Muolhlûm-ah hlim tlâng takin futsal fellowship an nei.
Inkhêl ṭan a ni hmain Upa Lalmalsawm, Asst. Conductor, NPT Central Choir-in hun hawng ṭawngṭaina a nei a, Blessed Choir Chairman- Pu Thangzarlien-in choir member-hai ta dinga infuina thucha hrilna neiin choir member-hai chu inpâkna hla hmanga rawng bâwl hlak an ni angin, an rawngbâwlna a hring nâwk zuol theina dingin an mimal nun hnê hmasak a ṭulzie le an rawngbâwlna sukchâu theitu ding khawvêl thil tam tak tlân san ngam a pawimawzie le chân inhuom a ṭulzie hai ursûn takin a hril.
1st Match-a hin NTP Central Choir le Blessed Choir pasal hai an inkhêl a, goal 7 ve ve thunin a hrât bîk um loin an inang char a, player-hai an in fit in hlasak chau ni loin ball pêt khawm an thiem ve hle a nih ti hriet theiin a um. 2nd Match-a nuhmeihai an inkhêl a, Blessed Choir in 1-0 in hrâtna an chang.
Pathien inpâkna hla hai saka rawngbâwl tlâng seng an ni angin choir member-hai lai inunauna le inlaichinna ṭha lem a um nâwk zuol theina dinga hieng ang futsal fellowship hi taksa insawizawina malama an huoihawt a ni thu Virthli palai an hung hril. Inkhêl zoin Pro Pastor Timothy H. Pulamte-in ṭawngṭaia hun khârin, hlim le lâwm tlâng taka ṭîn diel diel a nih.
NPT Central Choir le Blessed Choir hai hin hma tieng peia nun châu le beidawng hai kei hartu ding le thlarau nun châwm theitu ding inpâkna hla hai hung buotsai nâwk pei hlak dingin Virthli chun ditsakna insâng tak an hlân nghâl bawk a nih.
