Tarik 01.09.2021, zantieng dar 05 pm khan, College Veng, Kolasib ah Hmar Inpui, Mizoram Region le HSA Jt Hqrs. Kolasib hai chun Nk. Lalremsiami chawimawina hun an nei a.
Hi hun hi Pu Lalbieksang Hmar, Jt. Secy. HI in a keihruoi a, Pathien kuoma hun hai inhlanna Rev. Lalthazuala Fanai, EFCI in a nei hnungin Chairman in inhmelhriettirna hun a hmang a nih.
Rev. Lalthazuala Fanai chun Nk. Lalremsiami Hmar chu in dingțhițhuon tirin a lu chunga kut innghatin țawngțai pekna a nei a, chu zovah Pu Lalthankunga Hmar, President, HI chun thuhriltawi neiin Nk. Lalremsiami Hmar chawimawina hun a hmang bawk a nih. Hi huna hin President chun Lalremsiami chun Hmar hming sukțhatu le chawimawitu a ni zie le hnam ei nina hi theinghil lova, hmatieng pang peia khawm hnam suk hmingțhatu a ni pei na dingin ditsakna an hlan a, hun in zir sienla chu ruoi leh ropui taka a hlawtlingna hi lawm a, farnu sa mal hai chen khawm pek an nuom thu a hril a. Hun remchangah chu hun chu la hmang thei ngei a beisei thu a hril bawk. Hlawtlingna insang lem chang pei dingin ditsakna HI aiin anhlan bawk a nih. Citation hi President le Secretary Pu David Sungte haiin inhlanna an nei a, Hmar puon HI aiawin Pi Lalremkim Hmar in inbitirna a nei bawk a nih.
Iengkima Lalremsiami buoipuitu Pu Andrew Zote, in neitupa chu HI Secretary in Hmar Puonte inawrtirna a nei bawk a nih.
HSA, Jt Hqrs. President Pi Zothanmawii Zote chun thuhrilna neiin, a hming a ziekna hrim hrim ah Hmar ti hi belsa pei dingin anfui bawka. Tuhin Hmar hai chun kan lo welcome tawk naw che khawm i ti el thei, amiruokchu ditsakna i dawng ding ang lo baw buo tu ni pal inlau a um lei a ni a, lungril le titakzetin Lengpui Airport i hung țum anthawk khan kan lo welcome che a nih. Hmar hnam chu hung theinghil lova, țhahnem ngai pei dingin anfui bawk a nih.
Nk. Lalremsiami Hmar chun thuhrilna neiin program intar leia a nuom anga hun a mi pek theinaw chu pawi a ti a, Hmar Inpui le HSA haiin a ma an ngaipawimawna leiin lawmthu a hril a, HI Coordination Committee, Imphal hai chunga khawm lawmthu a hril bawk. Hmatieng a fepei na dingah Hmar hai chun ama chu hrezuipei dingin a ngen nghal bawk a nih.
Lawmthu hrilna hun Tv. J.Lalrorela, HI Finance Secretary in a hmang zoin, HI President in țawngțaina neiin hun suktawp a nih.
Hi hun sukpuitling a ni theina dinga hmalatu Pu Andrew Zote le Pi Zotganmawii Zote hai chungah Hmar Inpui, Mizoram Region chun lawmthu a hril takzet a nih.
David Sungte
Secretary
Hmar Inpui, Mizoram Region
