Diphu, September 2, 2021, Virthli (ONP): Covid leiin a hun taka tan le huoihawt ni naw sien khawm, Karbi-Anglong Hmar Association (KAHA) in hma latu dinga a ruot- Sinlung FC Diphu chun August 16, 2021 a'nthawk khan Hmar Martyrs' Trophy 2021 huoihawt tanin September 2, 2021 zantieng khan KASA Stadium, Diphu-ah Closing Ceremony ropuitakin hmang zo a lo ni tah. Hi hunser hi Lisa Varte in a keihruoia, Rev. Moody Inbuon in hun hawng tawngtaina a nei zoin chawimawina thilpek Khuollien inhlan anih.
Hi Huna hin Khuollienin Pu JS Khawbung, OC, Diphu PS a thang a, Hmar hnam ta dinga hringna hlu tak lo inhlantuhai po po inzâna insangtak a pek thu ursuntakin a hril. Hi hunser hmang ani sung hin Diphu HSA Unit han hnam lam mawi tak tak el inentirna hun an hmang a, hnam ta dinga martyr chang a, hringa hlu tak inhlantuhai po po hrietzingna le inzana suklangnain to tawka sunna hunser hmang a nih.
Diphu Hmar Martyrs' Trophy 2021 a hin Karbi Anglong district sunga Team tha tak tak 16 lai an thang a nih. Final Match a hin Hills United FC le United Brothers FC hai an inkhel a, an inkhel a mawiin hmu nuom a um hle. Hills United FC chun an khingpui United Brothers FC 1-0 a hnein Hmar Martyrs' Trophy 2021 "Champion Nopui" le sumfai cheng Rs. 30,000/- an lo dawm ta anih. 1st Runner-up hai Trophy le sumfai cheng Rs. 15,000/- inhlan an ni bawk.
Hi huna hin Hmar Martyrs' Trophy huoihawt ani sunga a kul a taia tlan vir - Medical Staff hai khawm chawimawina thuziek inhlan an nih.
Individual players lawmman dawng hai; Player of the match: Harbamon Timung, Hills United FC, Best goal keeper: Mukrang Terang,Tinali City FC, Top scorer: Vishal Gurung (9 goals),United Brothers FC, Player of the tournament:Kuvezo Vero, Hills United FC.
Lawmman semna nei ani zoin President, Sinlung FC Diphu in lumthu hrilna neiin hun suktawp a nih.
