~ Nk.Christina Buongpui
"I thu hi ka ke hai ta dingin khawnvar ana. Ka Lampui a dingin var anih"~(Psalm 119:105)
(Psalm 119:105) hi tukum a ka Kum Thupui dinga ka thlang ani a. Ei Lalpa thu thlum tak hi ka ta di'n Ka hnuoi rohlu anih.
Kum liem ta khan ka hringnun a harsatna lien tak el, ka ngaituo phak lo harsatna in ami tlak bûok a. Khang kum hun sung kha ka ta dingin hremhmun ang tluk anih. Kum 2 sung zet zawt chu mihriem ah damna, thlamuongna ka zawng a. Damna le thlamuongna ka zawng chu iengma lo el a'n chang zoa. Ka harsatna suk zuoltu an lo ni lem hlau a. Ka hnuoi beiseina po po a bo hnung chun ka harsatna hi mihriem isuk kieng thei ding ani naw a. Pathien chau naw chun ti chu ka lungril ah a hung in lang vang vang tah a. A sûn a zanin Isu Krista chu buon in, a hma bula inhlan tharin hun le ni hai ka hmang pei a. Pathienin hieng harsatna ka tûok hai hi san neia min tûok tir ni ngei a tih ti ringna keia hin a um tlat a.
"Ka tawngṭaina, ka beiseina, kan nghatna le kan hnemna tak chu nang I nih. Ka hringnun hi thimna in thla mi zar khum a. Sienkhawm, nisa sûok varmawi tak I mi'n hmu tir nawk ngei ding anih ti ka hriet. Ka hma ṭhuoitu ropui tak hung ni pei la, I remruotna hai hre thiem thei dingin varna, remhrietna mi pe rawh. Hi khawvel a hin I ṭhang lo chun kei te lul hi ieng ma lo el ka nih a. I thilthawtheizie, I ropui zie, Pathien hring bel tlak I ni zie, tawngṭaina dawn tu Pathien I ni zie min hmutirin, min hriettir rawh" tiin ka hni tlut tlut a. A kar chang lem chu naute in a nu bul a fak thei a ngen ang el ka nih.
Kum 3 a hung invawi meu chun ka ṭawngṭaina dawnna chu Pathienin ami pek tah a. Ka hriet naw kar ka lungril nasa taka inhliem, dam thei dinga ka ring ta ngai lo chu Nazareth Isu in ami lo suk dam pek ta anih.
Kum 2020 June 4, zingkar dar 8:00 AM - 9:00 AM inkar vel, kan zing bufak khawp lai vel a na. Ka hringnun a harsatna ka tûok mek le ka lo tûok ta hai popo ka ngaituo kirin, ka thla a si em em a. Ka room ah ka fe a, thla si takin ka ṭap ta ngawi ngawi a. Pathien kuomah Lalpa i tirko mi hung tir pek raw tiin ka ṭawngṭai a, ka ṭawngṭai zo hnung chun ka lungrilah thu a hung inlang vang vang a. Thu hung inlang ka hei ziek sûok meu chu, mak ti em em in ka en ta a. Hla a chang, a thunawn le kim diemin a lo na. Hla phûok ka tih ti ngaituona hrim hrim ka nei ngai nawh. ''Beiseina Thar" ti hla ka testimony a inthawk ei Lalpa'n ami pek a inthawk hla tamtak ami pek belsa peia. Ka phu lo malsawmna nasa takin ka dawng niin ka'n hriet a. Ka hlimin ka lawm em em a. Kha ni zingkar a inthawk ngei khan ka hringnun hmang mek chu an thlak hlawk tah a nih.Rawngbawl dinga thlang ka ni hi ka lawm takzet a. Khang harsatna popo kha tûok naw lang, hla khawm hi ka phûok ka ring naw a, Lalpa le kan inlai chinna khawm det zuol naw nih. Iengkim hi san nei a tlung vawng ani a. San neilo a tlung iengkhawm a um naw nih.
Unau, I hringnun ah harsatna i tûok changin ei Lalpa pan rawh. I hriet thiemnaw po po lo hrilfie pek ngei a ti che. Ama a chun damna, thlamuongna, hadamna a um si a. Lalpa rawngbawl hi insirna ding a um naw a. Nitin, zantin le darkar tinin Lalpa le leng hmun khat tum ei tiu. Lalpa hmangaina thla zar hnuoia cheng hai chu an ham a ṭha si a. Iengkim an tuok taphawt Lalpa ropui zie an chungah an lang hlak. A thlawnin i hringnun ihmang ral el ding hi phal naw la, Lalpa'n a kut le ke, a taksa peng a di'n a dit che a nih.
Tiemtu hai Lalpa'n malsawmna tam takin vur pei raw se cheu. Ka lawm ie.
