Responsive Ad Slot

Music Production Studio "ENVISION RECORDS" hawng

Sunday, September 12, 2021

/ Published by VIRTHLI

Rengkai/Neihsial Veng, September 12, 2021, Virthli (ONP): Vawisun dar 12:00 Noon khan Neihsial Veng-ah Music Production Studio "ENVISION RECORDS" chu Rev.Lalramlawm Inbuon, EAL, ICI in hawngna le Pathien kuoma inhlanna a nei. Hi studio hi Pu Jackson Darthangluoi Joute le a nuhmei Pi Mary Lalthlawnpek hai siem a nih a. Studio umna hmun hi an chengna in, a sawng chunghnung taka mawi le uluk taka bawl le siem a ni a. A hmun hi a'n hawi el chau niloin studio hmangruo hai khawm a changkâng thei hle.


Hi huna "Envision Records" neitu- Pu Jackson Darthangluoiin thu a hrilna a chun mihai anga a hlâwk hnawta studio hi siem a ni naw thu a hril a, hun sâwttak a inthawka hla le rimawi a lo inhnik vê na zâr a recording studio nei ve ngei a lo tum ve thu hrilin Pathien zar chaua sukpuitling theia a um chu lawm um a ti hle thu a hril a. A hril nawk peina a chun hla tienga inhnik nei, amiruokchu mihai thaw ang thaw thei ve lo, sum le pai a harsatna nei hai ta dinga charity anga "Envision Records" hi a buotsai a ni thu a hril.


Recording studio hawng thara um hi Kings & Prophet a Audio Engineering zo- Mr. James Hriler in a enkawl ding a nih a. Hi taka hin Recording, Post Production, Live Sound, Mixing & Mastering inchuk thei a ni ding a nih.


Hawngna hunser hi ruolṭha, lainatu, lawmpuitu le Kohran tiengs thuoitu fe khâwm haiin an uop a, hunser hmang a ni zoin refreshment tuihnai tak el an kiltlâng a nih.

Don't Miss
© all rights reserved
made with by Simon L Infimate