Responsive Ad Slot

Barak Valley Assam rama Hmarhai harsatna le inzawmin Minister inhmupuina nei

Sunday, September 12, 2021

/ Published by VIRTHLI

Guwahati, September 12, 2021, Virthli(ONP): Barak Valley, Assam rama Hmar hai Scheduled Tribe a zieklut an la ni nawna chungthuah Dr. Vanlallien Pulamte, President, HNU, Assam le Pu Rokhumlien Hmar, Vice-President, HNU, Assam haiin Dr. Ranoj Pegu, Minister, Welfare of Plain Tribes & Backward Classes, Government of Assam inhmupuina an nei a, Barak Valley a Hmar hai Scheduled Tribe a zieklut dingin Memorandum an pêk. Minister kuomah hin Ministry of Tribal Affairs, Government of India in F.No.18012/10/2009-C&L.M-I, Government of India, Ministry of Tribal Affairs (C&LM-I Division) dated 19.12.2014 file hmanga Barak Valley a Hmar hai Scheduled Tribe a zieklutna dinga file a lo put up le Letter No.11012/46/2014-NE.IV dated 29.9.2014 a Ministry of Home Affairs, Government of India in Barak Valley a Hmar hai ST a zieklutna dinga file a lo put up hai po po WPT&BC Minister kuomah hin chipchiertaka hril a nih.



Assam Institute of Research for Tribals And Scheduled Castes a thuneitu hai inhmupui hmasa phawt a nih a. Assam rama Tribal hnam hai Scheduled Tribe a inzieklut ding hin Assam Institute of Research for Tribals And Scheduled Castes haiin research thawin ST a inzieklut ding hai recommend an thaw phawt a ngai a. Chuongang tak chun Barak Valley a Hmar hai hi Tribal Research Institute (TRI) in Scheduled Tribe a zieklut dingin File No.AIRTSC(HMAR) /7/2015/27, hmangin recommend March 11, 2015 khan a lo thaw dai tah a nih. File a thara put up tah lovin file hlui hai hmanga Assam sawrkar Cabinet meeting huna  pasi el dingin Tribal Research Institute (TRI) thuneitu haiin Dr. Ranoj Pegu, Minister, Welfare of Plain Tribes & Backward Classes, Government of Assam, inhmunpui a ngen dingin thurawn an lo pek angin inhmupui a nih. Dr.Pegu hi a lo inhawng khawp el a, Dr.Vanlallien Pulamte in Minister kuomah hin Flie hlui hai le thil lo fe dan hai chipchiertaka a hril zovin, Minister hin Barak Valley a Hmar khuo list le population pe dingin a lo hril angin pek nghal a nih. Minister chun Barak Valley a Deputy Commissioner (DC) pathum hai, Cachar DC, Karimganj DC le Hailakandhi DC hai kuomah Hmar khuohai le an population verification thaw dingin thu a pek nghal a. DC pathum haiin verification an thaw zo hin Assam Cabinet in Barak Valley a Hmar hai Scheduled Tribe a zieklut dingin recommend thawin India sawrkar Delhi tieng an thawn ding thu a hril.


Barak Valley a Hmar hai hi Scheduled Tribe an ni naw leiin harsatna tamtak an tuoka, Political Benefits ieng khawm chan an nei thei ve naw a nih. Assam sawrkar in July 20, 2021 khan Assam rama hnamhnufuol Tribal hai ta dingin Tribal Belt siemna dingin Assam ram sunga Deputy Commissioner (DC) hai po po kuomah proposal siem dingin thu a peka. Tribal Belt Assam sawrkarin a siem tum mek khawm hi Barak Valley a Hmar hai chun Scheduled Tribe an ni ve naw leiin an inchu thei nawh a. Hieng a ni lei hin Barak Valley a Hmar hnam Organisation po po hai chun Hmar hai ST a inzieklut dinga hmalak nghal an remti ang dungzuia hma hi lak a nih.


HMAR MIL LECTURER POST SIEM DING LE HMAR LITERATURE, ASSAM THUAH


Dr.Ranoj Pegu, hin Minister portfolio pahni a chelkhawp ang dungzuiin Assam rama Hmar hai harsatna subject pahni; Hmar MIL Lecturer post siem dan ding thu le Hmar Literature sukhmasawn dan ding thuah, a ni hnina a inhmupui nâwk a nih. A ni hnina ah hin Hmar Literature sukhmasawn dan ding le Hmar MIL Lecturer post siem dan ding chungthuah Dr.Ranoj Pegu, Hon’ble Minister, Education a ni ang dungzuia inhmupui a ni angin Dr. Vanlallien Pulamte khawm General Secretary, Hmar Literature Society, Assam (Hmar Sahitya Sabha, Assam) a nina platform hmangin Minister hi inbiekpuina nei a nih. Hi huna hin Pu Rokhumlien Hmar, Vice-President, HNU, Assam khawm a ṭhang ve.


Hmar MIL Lecturer post ding Assam University hnuoia college pathum; 1. G.C. College, Silchar. 2. Cachar, College, Silchar le 3. Nehru College Pailapool haia ding hni a nih a. Kum 2008 a inthawka Hmar MIL Assam ramah Higher Secondary School level le kum 2010 a inthawkin Assam University hnuoia Degree level inchuk tan a ni a inthawkin, Hmar MIL Lecturer hai hlaw hi Hmar hnamin tu chen hin maw an phur thu uortaka hril a ni chun Minister lungril a tawkin a ngaituona a fang hne hle. Lekha a ziek nghal a, Principal Secretary, Education, Government of Assam le Director, Higher Education, Government of Assam hai chu Dy No.1062 Date 9/921 File hmangin hi ni la la hin a pek nghal. September 21, 2021 hin Silchar ah a hung ding a nia, hi huna hin Hmar MIL inchûkna college hai kan a tum thu a hril a, Hmar hnam ṭhuoitu hai le inhmu nawk dingin a hril.


Haflong Government College, Diphu Government College le N.C.Hills Autonomous Council le Karbi-Anglong Autonomous Council a college hrang hranga Hmar MIL inchûkna college a Hmar MIL Lecturer post siemna ding lekha hi iemani chen a lo phâk tah a, Council a inthawka recommend-na lekha khawmin iemani chen a lo phak an tah. An ni hai hi chu Sixth Schedule hnuoia Autonomous Council nei an ni leiin an subject a dang leiin file hi a hrana fe a ni leiin Minister inhmupuina huna hin hrilsa a nih naw a nih. 


Kumtina Assam sawrkarin hnam hrang hrang hai literature sukhmasawnna dinga Corpus Fund 22 indigenous Sahitya Sabha (literary bodies) hai kuoma Rs.25 lakhs a pek hlak chu Hmar Sahitya Sabha, Assam (Hmar Literature Society, Assam) khawm pe ve dingin Dr. Vanlallien Pulamte, General Secretary, Hmar Sahitya Sabha, Assam, (Hmar Literature Society, Assam) in a hnina chu dawnin Lekha a ziek nghal a, 1). Principal Secretary, Education, Government of Assam, 2). Director, Higher Education, Government of Assam le  3). Director, Anandaram Borroah Institute of Language Art & Culture Assam (ABILAC) hai chu  Dy No.1063 Date 9/921 File hmangin hi ni la la hin a pek nghal a nih. Minister hi Karbi Sahitya Sabha, Assam le Dimasa Sahitya Sabha, Assam hai kum tina ABILAC hnuoia inthawka Corpus Fund an lo pekna hlakna lekha hai inentir a nih a, Hmar Sahitya Sabha, Assam a thang ve naw chu pawi a tih hle a. Kum thar tieng chu an thang ve ngei ta ding thu a hrila file put up nghal a nih.


Assam ram sunga literary bodies 22 hai inkhaikhawmna le Corpus Fund pekna hmangruoa Assam sawrkarin a hmang Anandaram Borroah Institute of Language Art & Culture Assam (ABILAC) Director chu inbiekpui nghal ani a. Hmar Sahitya Sabha, Assam chu ABILAC hnuoia affiliate body pakhata sie ve dingin file put up tan nghal a nih. Kum thar a inthawkin Hmar Sahitya Sabha, Assam (Hmar Literature Society, Assam) in Rs.25 lakhs kum tin a hmu ve chun Assam rama Hmar tawng sukhmasawnna dingin a tangkai hle ding a nih.

Don't Miss
© all rights reserved
made with by Simon L Infimate