Tuiṭhaphai, September 17, 2021, Virthli (ONP): Dr.Chaltonlien Amo, Tipaimukh MLA le hnam-a a rawngbâwlpui hai chu vawisûn Nehru Marg, Churachandpur-ah inhmukhâwmin inrâwntlângna an nei.
Hi huna hin palai mî za chuong fê khâwm ha'n hung tlung ding 2022-a Manipur Assembly inthlangpui um dinga hin hnam ngîrhmun le a biel ngîrhmun enin, Dr. Amo chu Tipaimukh bielin a la mamawzie thu hai hrilna hun an nei a, Tipaimukh biela sin zo mêk a um tah le, sin bângkhâi tam tak thaw mêk a um le a biel sûng sukhmasâwn dinga hmâ lâk mêk a um hai bawizui pei ṭûla an hriet leiin, Dr. Amo chu 55-Tipaimukh Assembly Constituency-ah la ngîr nâwk ngêi dingin thuthlûkna an siem.
Dr. Amo chun hnam-a a rawngbâwlpui hai le ditsaktu tam tak ha'n Tipaimukh MLA dinga la ngîr nâwk ngêi dinga thûthlûkna an siem chu a'n zâ thu hrilin, kum 2022-a Manipur Assembly inthlangpuia hin a ngîr nâwk ding thu a puong.
Hi hunser hmang huna hin hnam sûnga ṭhuoitu khun tak tak, political party ṭhuoitu, ziekmi, lainatu le MLA la ni nâwk ngêi dinga Dr. Amo ditsaktu ha'n thu hrilna an nei tâwl a nih. Inrâwntlângna nei a ni zoin Dr. Amo chu Manipur Governor, La Ganesan inhmupui dingin Imphal a pan nawk nghal.
