Halflong/Muolhoi, August 26, 2021, Virthli (ONP): North Cachar Hills Autonomous Council (NCHAC)-a Executive Member ni lai mêk, Pu Ngamrothang Hmar & Family-in hun sâwt taka inthawka Halflong, Muolhoi, Huonveng a Zâwlbûk Cafe an bawl chu zo fel ni tahin, August ni 25, 2021 khan Shri Debolal Garlosa, CEM, NCHAC-in hawngna a nei. Hi huna hin Zâwlbûk Cafe-a fâk le dâwn chi tum tum buotsaia umhai pholang niin an kîl tlâng tâwl nghâl. Hawngna hunser hi Halflong khawpui sûnga mi pawimaw tak tak ha'n an uop a, hlasak thiem tak tak ha'n mipui fe khâwmhai an inâwi. Zâwlbûk Cafe hi tienlai Zâwlbûk anga hmangruo hieng; ruo, thing, inhna le tlângrampa hmangruo chi tin rêng hmanga bâwl a ni a, mipui mit a hîp hle. Hi cafe-a hin tlângram hme, inhnik tak tak bâkah fâk le dâwn chi hran hran a um ding a nih.
Zâwlbûk hin Pi-le-Pu tlâwmngaina a'n entir ang hrimin, ṭhangtharhai lai tlâwmngaina hi sukhring zing a ni theina ding le, ei hnam nunzie mâwi tak el tlâwmngaina hin chuoi tieng pan loa a pâr vul zing theina dinga a hming dingin, "Zâwlbûk Cafe" sak a ni thu, Pu Ngamrothang chun a hril. A hril peinaa chun, Zâwlbûk Cafe-a hin tulaia ṭhangthar tam takin an hmu phâk ta lo hieng; bu sukna sum, pâikâwng le rîng kawl, hnam rohluo chi hran hran hai siena suor siem niin pholang a ni thu a hril a, sum suklai ngêi Zâwlbûk Cafe-a hin hmu thei a ni ding thu a hril.
Zâwlbûk Cafe umna hmun hi a'n hawiin a thaw veng hle a, fâk an buotsaihai a'n hnik el chau ni loin, sûngkuo, ruolcham le pawmlai 'D' nei hai ta dinga insukhlimna hmun remchâng tak el khawm a nih.
