Imphal, August 4, 2021, Virthli (ONP): Tipaimukh bieltu Dr. Chaltonlien Amo, MLA a Media i/c Muona Infimate chun Parbung Hr. Sec. School a admission chungchang le inzawmin Dr. Amo thu puong hieng ang hin thusuok a siem.
Parbung Hr.Secondary School hi ei bieltu MLA Pu Chaltonlien hmalakna zarin 2018 kuma inthawk hawng tan a lo ni ta a. Nisienlakhawm, student admit an tlawm hlak leiin sawrkarin a mi khar pek nawk vang vang hlaka. Thi vang vang hring zing siin ei la fe thei tawk tawka. University a sum(Subjects Fees) sung tulhai Pu Chaltonlien MLA, Pu Lalhmangpui MDC, Pu Lalruot Ralsun Principal i/c le khawsung Village Authority haiin an mi ngaituopek hlak lei a nih. Lawm a um tak zet a nih. Teacher tam tawk naw leia student admit an tlawm a nih ti suonlamin ei thiem thu Department(sawrkar) ah ei hril hlaka, Assembly rorelna hall a chen ei MLA in a lo khekpui a nih a. Tuhin chu MA val teacher 15 parbung Hr.Sec. Schoolah posting ei nei tah.
Tukum admission tan a hun nawk ta a. Ei Hr. Secondary School a hring zing theina ding chun student ei hau a tul a nih. Chuleiin, tukum admission tan nghal ta dinga hin Parbung Hr.Secondary a 11 class a admit ta phawt an admit fee popo ei MLA inzaum tak Pu Dr.Chaltonlien Amo in a tumpek vawng ding a nih. Ei Hr.Secondary neisun a hring zing theina dingin a tam thei pa tawp in admit tum ei tiu, a bikin Pherzawl District huom sunga inthawka pass popo hai lem chu Parbung Hr. Sec. ah in admit seng dingin bieltu MLA in a ngen a nih.
Tipaimukh biela inthawka HSLC Exam hlawtlinghai popo bieltu MLA Pu Dr.Chaltonlienin lawmpuina chibai a buk cheu.
