Parbung, August 19, 2021, Virthli (ONP): Tipaimukh MLA Dr. Chaltonlien Amo, Covid Awareness-cum-Enforcement Committee Tipaimukh Segment a Chairman ni bawk chun Parbung CHIC a Covid 19 invawi hai hai fak le dawn ding thangpuina chi tum tum a pek. Hi huna hin Pu L. Thansiem, Parbung Village Level Task Force hmingin lawmthu hrilna a nei a, hieng ang mipui hmangaitu le an tul huna che muong ngailo MLA an nei chu lawm um a ti hle thu a hril. Thilpek chi tum tum hai hi bieltu MLA Dr.Chaltonlien Amo aiin Tipaimukh AYC General Secretary- Tv. Hrilhmingthangin vawituk Parbung VLTF hai kuomah inhlanna a nei.
Hieng hai baka hin Pu Chaltonlien Amo chun Parbung khawsunga Containment zone a um mek vengbuk hieng- Hmawngzang, Sap-in-tlang le Field lam hai fak le dawn ding thangpuina a pek sa a, Youth Congress haiin semna sin an va thaw. Hi Huna hin Pu Lalrofel chun Containment Zone a um hai aiin lawmthu a hril a, Pu Chaltonlien Amo hma lakna chu inpak um le lawm um a ti hle thu a hril a, harsat le beidawng huna mipui hmangaitu MLA an nei chu thlamuong a um thu hrilin hmatieng peia khawm mipui rawng a bawl peina ding a hai ditsakna insang tak an hlan a, Pathienin a hma thuoi pei raw seh tiin lawmthu a hril.
Chuong lai zing chun Parbung CHC a ding Covid dona kawnga hmangruo chi tum tum medical staff hai kuomah Dr. Amo aiawtu haiin vawituk inhlanna an nei a, Parbung CHC-a hmang ding Dr. Amo in Ambulance pakhat a pek dawk khawm inhlan sa nghal a nih.
