Imphal, July 15, 2021, Virthli(ONP): Covid hri inleng leia Tipaimukh biel sunga a ṭul ang anga ṭhangpuina le sawmdawlna sin thaw dingin vawisun khan Dr. Chaltonlien Amo a Team ha'n Vangai biela khuo hran hran a haia thangpuina sin thaw dingin Imphal suoksanin Vangai biel an lo pan tah. Tipaimukh MLA Dr. Chaltonlien Amo chun ama ngei fein a biel mipuihai kan nuom hle sien khawm, Covid hripuiin a lo man fuk ve leia taksa bawrsawmna a tuok chu tuchen hin hriselna tieng harsatna a la tuok zing a, ama aia fe mi tlawmngai hai hin Vangai Sub-Division sunga khaw tin hai fangin an thei ang angin ṭhangpuina sin thawin hma an lak ding a nih.
Tipaimukh biela Covid hri inleng leia ṭhangpuina sin thaw dinga fe hai hi Pi Lalramsang Amo in ṭawngṭaina'n an thla a, Dr. Chaltonlien Amo, Hon'ble MLA & Chairman, Covid Awareness-Cum-Enforcement Committee, 55-Tipaimukh Assembly Segment in a chengna Quarter, Lamphel, Imphal a'nthawk a vailiem tah.
Vangai Sub-Division a thangpuina le sawmdawlna sin thaw dinga fe, Tipaimukh MLA Dr. Chaltonlien Amo a Team hai hin Ambulance thar pahnih bakah Vangai biel sûnga Primary Health Centre a haia hmang ding hmangruo chi tum tum, Village Task Force le mipuiin an ṭul huna an hmang ding hieng- Oxygen Concentrator, Pulse Oxycilator, PPE Kits , Thermometer , Sodium Hypochlorite, Hand Sanitizer , Face mask, Hand gloves le damdawi chi hran hran hai an phursuk. Dr. Chaltonlien Amo a Team hai hin June 23-28, 2021 hun sung khan Hmarbiela khaw tinhai fangin thangpuina sin an lo ta bawk anih.
