~ Rev. Dr. Lalrosiem Songate
Tiena-tlanga inthawkin hri inleng dangna dingin vaccine hi an lo siem suok hlak a, thipui el thei ding hri tam taka inthawkin ei him pha bak ah hri țhenkhat lem chu an bo pha hiel ta nghe nghe a. Amiruokchu tuta ei hripui tuor mek Covid-19 laka invengna ding Vaccine ruok hin chu hril a hlaw em em. Hienga hrilbuoi a hlaw bek bek na san hi ei hang belchieng ding a nih.
Chu laia pakhat chu kum 2010 laia Ted Talk platform a Bill Gates thu lo hril kha a ninaw zawnga hrildar a ni lei a nih. Bill Gates in khawvel mihriem population control na dingin vaccine a pawimaw ti thu a hril kha a nih. Hi thu changchawiin Bill Gates in vaccine hmanga khawvel mipui that țhe ding ti ang zawnga hril dam, mihriem hringna a suktawi ding ti dam, mihriem chithla thei loin ei um ding ti dam, vaccine inkaphai chu zombie ah an hung inching vawng ding ti dam le thuvuongva chi hran hran a hung suok pha ta a nih. Vaccine leia khawvel population pung pei control dan ding a hril kha an lakkawi a ni tak. Hieng ngaidan mak tak tak hi eini lai chau niloin khawvel rambung hran hrana khawm tam takin an hril a nih.
Bill Gates chun a buoipui tak chu khawvel mipui nuoi chimitna dinga țium tak chu ralthuom hai hi an ninaw a, hripui hi a ni lem a ti a nih. Bill Gates ngaidan chun khawvela ralthuom hrat tak tak, hieng nuclear ralthuomhai chen um sienkhawm, khawvel population nuoi chimit ding zawnga hmang ei um ring a um naw a, chuleiin hripui chau hi ami nuoichimit theitu ding a nih, a ti a nih. A hril peina a chun hripui laka invengna vaccine ei inkap seng chun khawvel mipui nuoichimitin ei um naw ding a nih.
Chun a hril zawm peina a chun mihriem thina rate (mortality rate) khawm hung tlahnuoi a ta, mortality rate a tla hnuoi chun khawvel mihriem birth rate khawm anhnuoi ti hi research a an hmusuok bawk thu a hril a. Chu umzie chu vaccine leia hripui laka khawvel mipui ei him tlang phawt chun mihriem thi zat (moratality rate) khawm tlahnuoi a ta, naute piengthar zat khawm pung hratnaw sawt a ta, chu chun khawvel mipui fak le dawn thua intodelna khawm a hung țha zuol bawk ding a ti a nih.
Chun Bill Gates hril pei dan chun khawvel mihriem po po vaccine inkap vawng ta inlakhawm iengtinam mitinin mani vaccine record vawng himin inkap le inkapnaw iengtinam hre thei ei ta? Entirna dingin ram buoina leia mani in le lo maksana raltlanhai dam, an vaccine certificate chau khawm nilo, an thilnei le lekha pawimaw hai khawm iengkhawm la hman loa raltlanhai dam um an ta. Chuong ang huna khawm inkap le inkapnaw iengtinam hre thei ei ta?
Bill Gates bawkin a hril dan chun vaccine a hin thil chihnih - damdawi le computer chips chin deu, mitlâwng khawma hmutheilo, ei vaccine information pesuok thei ding sie ni sien. Chuong ang hmanga mi inkap phawt chu khawl hmangin an vaccine record an taksa a inthawkin an hriet thei ding a nih ti a hrilna a nih. Hi thu tak hi a la suol pawl haiin Antichrist inchikna sakawl number leh hril matin ama Bill Gates chen khawm Antichrist hungna dinga lampui induongtu ang hielin an hril ta nghe nghe a nih.
Hieng anga Bill Gates le inzawma awmlo bak saka hrila um po po hai hi News agency inlar hieng Reuters le India Today haiin Fact-Check an thaw a, Bill Gates in a hril anga an tihai hi a hrilnaw zie le a thuhril an lakkawi lem a ni zie an hmusuok a nih.
Hieng ang zawnga hril pawlhai hi Conspiracy Theorists an ti hai, le Pathien thuhriltuhai laia Doomsday preacher an ti hai hi an ni hlak a. Conspiracy Theorists ei ti hai hi Sawrkar thilthaw hrim hrim hai hi thu phierruk neia an thaw ti zawnga ngai hlak mi an ni a. Vaccine khawm hi mihriemhai thina ding annawleh suonmawng na dinga thuphierruk a nih, tiin an hril hlak a nih. Chun Dooms Day preacher ei tihai hi Pathienthu hriltu Pathien hremna hung tlung ding le khawvel tawp hun ding awn zawng ngawta thuhriltuhai hi an ni a. Khawvela thil tlung iengkim hi hun nuhnung tieng awn zawng ngawtin an en a an hril hlak bawk a nih.
Hieng ang mihai hin an thilhmu le hriethai zeldinna nasatak le chawkpawlin mak tak tak le awmang tak tak hi an hril rawp hlak a, mi tamtak an țhuoikawi hlak a nih. Hieng ang pawl hi eini lai chau ni lovin America ram le khawvel rambung dang danga hai khawm an tam ve em em a nih. Hun nuhnunga um ei ni tah ti le khawvel tawp a hnai tah, ti hai chu Bible in ami hril a, pawm ding khawm a ni ngei. Amiruokchu thil iengkim chu tieng awn zawng ngawta hril kha andik vawng chuong naw a nih.
Covid vaccine chau khawm ni lovin Aadhar card chen khawm Bible a sakawl number le hrilkawp a, Aadhar Card khawm dit lo, vaccine khawm inkap nuomlo ei um tawl a, hi hi a pawi khawp el. Aadhar card ang hi eini India chau hi a nei ei ninaw a, eini lem chun ei nei inhnu lem hman hman a nih. US a khun Social Security number an ti a, a rammi phawtin an pieng hlima an nei nghal hlak a nih. Sina inruoi ding khawmin bank account hawng ding khawmin, sawrkar thangpuina dawng ding khawm ni sien, iengkimah Social Security number an pek ngei ngei hlak a nih. Khawvel rambung tinin hieng ang number hi tiena-tlanga inthawka an lo nei seng ta lem a nih. India sawrkar khawmin Aadhar card a rammihai a min chikna dingin a hung induong a, thil țha tak a ni a, mi tinin ei nei ngei ngei ding lem a nih.
Chun khawvela thiemna le varnahai hi Pathienin mihriemhai ei nei a phal a, chulei taka mihriem khawm hi ramsahai neka chunghnung lema ami siem ei nih. Chun mihriem varna le thiemna hai leiin thil ṭha tamtak siemsuokin a um a, ei khawsak khawm a sukinhawi pha em em a nih. Chuong ang bawkin khawvel thiemna le varna hai inchukin scientists dam, engineer dam, daktawr le nurse hai dam ei nei a, an thiemna hai leiin ei khawvel hringnun a sukinhawi pha em em a nih. Damdawihai dam ei siem suok a, ei damnawna hai khawm ei dam pha hlak a nih.
Chuong ang bawkin tuta Covid vaccine khawm hi Pathien malsawmna zara ei khawvel mithiem haiin hmawsarum tak meu meua an hung siemsuok a ni a, lawm a um em em a nih. A siemsuoktu le a hre lem daktawr le sawrkar thuneituhai hi an kap hmasa sa ah an la hei țhang nawk a. Annihai inkap nuom loin mipuihai inkap hmasa ding ti hai sien chu ringhlel khawm a awm. Chuong ta nek hmanin a thiem le a var var an inkap hmasa a. Rambung hausa hai lem chun an siemsuok hmasa sa advance order thawin an inchawk khawl țeu țeu leiin ramhnufuol haiin an dittawk an hmu vak naw nghe nghe a nih.
Chuong ang kara eini rawi, a chanve khawm hre phak lo ruolin intihre deua, chuongchu-khangkha tia vaccine lak ei nuomnaw hi a pawi khawp el. Eini le ei nau ditum tak tak hai, hi hripui laka ei hima, ei dam khawsuok theina dingin vaccine hi a thei phawt chun inkap seng inla nuom a um hle a nih.
