Responsive Ad Slot

CACHAR HMAR AUTONOMOUS COUNCIL THUAH INRAWNTLANGNA NEI

Sunday, July 11, 2021

/ Published by VIRTHLI
Ngaibanramthar, July, 11, 2021, Virthli (ONP): Assam sawrkarin Cachar Hmar Autonomous Council le inzawma June 29, 2021 a thusuok a siem ang dungzuiin, vawisun khan Ngaibanramthar khuoah Barak Valley a Hmar hnam Organization po po hai le mi fielbik hai leh HNU, Assam huoihawtna hnuoiah inrawntlangna nei a nih. Palai 53 an thang a, inrawntlangna nei a ni zo hin Ngaibanramthar Village Council haiin palai fekhawm hai bufakpuina an nei.  HPC-D Cachar in Assam sawrkar hnuoia Cachar Hmar Autonomous Council State Act a demand thu chu Assam sawrkar ngaiven a hung hlaw pei a. Assam sawrkar chun HPC-D Cachar hai chu inbiekpui dingin hma a hung lak mek a, silai intung dan ding thu le cadre verification chen khawm a lo thaw zo tah a. Assam sawrkar le inbiek dan ding thu le tuchena hmalakna palai fekhawm hai lai hril a nih.

 March 28, 2021 a Pu Himanta Biswa Sarma, Chief Minister, Assam in Pailapool Field ah Assam Assembly election leia vote a hung zawngna-a a thuhrilna a BJP in sawrkarna kan siem nawk  chun Cachar Hmar Autonomous Council hi ngaituong ka tih, lungngai naw ro, a ti chu bawzui pei a nih a. Assam Chief Minister le inbie ding hin July thla tawp tieng beisei a ni thu Pu Kaushik Rai, Hon’ ble MLA, Lakhipur chun a hril. Lekhapawimaw hai lo siemfel vawnga thil tul le pawimaw ding hai inpeifel dingin a hril bawk. Inbiekna a palai ding hai khawm siemfel a nih tah.

Cachar Hmar Autonomous Council State Act HPC-D Cachar in a demand-na huomsungah hin Hmar khuo 76 a um, hieng Hmar khuo haiin an del ram po po hai hi British sawrkarin India ramin zalenna a hmu hma daia Jhumland permission a lo pek an nih. Cachar Hmar Autonomous Council State Act chungthu hi BJP Assam State level committee-naah khawm hril a lo nih tah a. Cachar a Hmar hai hi Assam Institute of Research For Tribals And Scheduled Castes  haiin Scheduled Tribe ni dinga recommend a thaw thei chun ngaituo ni’ng a tih tiin thutlukna an lo siem tah hrim a nih. Assam Institute of Research For Tribals And Scheduled Castes chun Cachar a Hmar hai hi Scheduled Tribe an nina dinga inkhina (criteria) pa 5 hai hmanga research thawa a lo inkhi hnungin Scheduled Tribe ni dingin  No.AIRTSC(HMAR)7/2015/27 file hmangin Dated Guwahati, 11th March 2015 khan recommend a lo thaw dai tah a nih. Hieng thu hai hi vawisuna palai fekhawm hai hrilhrietna nei a nih a. Hieng hi thil um dan a ni leiin Cachar a Hmar hai ta dingin beisei a umin hmakhuo a eng hle a nih. Pu Himanta Biswa Sarman sawrkar hin Cachar a Hmar hai harsatna hi sukkieng a tum tak tak nia hriet a ni lei hin vawisuna palai fekhawm hai khawma an thisen farkang rawt chena Cachar a Hmar Autonomous Council hmu a ni theina dingin inthuruoltaka thang an lak ding thu an hril.
Cachar a Hmar hai ta dinga Autonomous Council State Act hnuoia ei hni ang hi tuhin Assam sawrkar hnuoia hin pa 6 lai zet thatakin an function zinga. Chuonghai chu; 1.Rabha Hasong Autonomous Council, 2.Mising Autonomous Council, 3.Tiwa Autonomous Council, 4.Deori Autonomous Council, 5.Thengal Kachari Autonomous Council le 6. Sonowal Kachari Autonomous Council hai an nih. Nikum 2020 March 24 khan Moran Autonomous Council, Matak Autonomous Council le Kamatapur Autonomous Council Bill Assam sawrkar chun a lo pasi a nih. (input: Dr. Vanlallien Pulamte)
Don't Miss
© all rights reserved
made with by Simon L Infimate