CCPur, June 01, 2021, Virthli(ONP): Famtah Upa J Lungawi i ziek English-Hmar Dictionary chu Android application le website (Online Dictionary) a siem a um chu mitin hmang thei dingin tlangzar a lo ni tah.
Hi online dictionary le Android application siema umhai hi VIRTHLI team hai hmalakna niin Pu Simon L Infimate in a siem a nih. Virthli team hai chun hnam le inchuklai hai hmakhuo ngaina leia Upa J Lungawi a sunghaiin a dictionary phal taka an pekdawkna chungthua an lawm hle thu le inpak an um thu an hril.
Upa J Lungawi a naupa Pu Herbert L Joute chun hi dictionary applictaion siema um chu an pa hrietzingna dingin hmarnauhai tadingin an inhlan thu a hril a, 4th Edition hai chen sut a lo ni hnunga khawvel changkang pei dan le inmil a hieng anga buotsai pektuhai chunga lawmthu an sungkuo aiin a hril bawk a nih.
Android Application hi Offline a hmang thei niin Play Store ah "J Lungawi Dictionary" (https://play.google.com/store/apps/details?id=com.lungawi.dictionary) ti a hmu thei a nih. Chun, a website www.hmardictionary.com hi awlsam deua a App hmang kher lova Desktop le mobile haia hmang thei dinga siem ani bawk a nih. Tuta dictionary a hin thumal le a hrilfiena 20,000 chuong lai zet a um a nih.
A hmang dan hre nuom hai chun video a link a hin en thei: https://www.youtube.com/watch?v=EOzVZOSqLxo
