Haflong, 28 June 2021, Virthli (ONP): Liemtah 27 June khan Indigenous People Forum le Indigenous Student Forum, Indigenous Women Forum Palaihai chun IPF demand le inzawmin Assam Chief Minister Pu Dr. Himanta Biswas Sarma chu a Office Chamber ah inhmupuina an nei.
Hi hun a hin Assam Chief Minister a tling lawmpuina le chawimawina thilpek an inhlan bawk. IPF demand le inzawm hin thuhnung tamtak an hrilpui a, Pu Sarma Chief Minister a hung ni hi IPF milesa chun beiseina insangtak an nei thu an hril bawk. Pu Sarma hin hungtlung ding July thla hin Haflong ah IPF demand le inzawma inbiekna dawkan a buotsai tum thu a lo hril chu IPF Palai haiin an lawm hle thu an hril.
IPF hin hun sawttak a inthawk tah khan Non Dima haiin sawrkar sin le kawng iengkima hnawchep an ni thu le sawrkar a inthawk an hmu ding ang an hmu naw thu hai Assam Sawrkar kuomah an lo inthlun tah a, hi le inzawm hin 2010 khan Task Force hai chen lo indin a ni tah a nih. Hi Task Force hi Pu PP Varma, Chief Secretary, Government of Assam Chairman niin, Pu Jisnu Barua Assam Chief Secretary nilai mek a um hi member a țhang ve a ni bawk.
Task force hin IPF Demand hi pek ni raw seh, 3(c) of 244(2) & 275(1) Under Sixth Schedule to the Constitution of India dan hnuoi a tuta NC Hills Autonomous Council le District um lai mek hi pahni a țhe ve ve ni raw seh, pakhat Dimasa, pakhat Non Dimasa tiin Recommendation khawm an lo pek tah a. Chun, 2019 Assam Budget session a khawm khan Pu Sarma hin Finance Minister a nina angin Bifurcation thaw dinga passed a lo ni ta thu hai a hril a, Pu Sarma ngei khawm hin 5 July 2019 khan Assam Chief Minister Pu Sarbananda Sonowal kuomah Assam Budget 2019 a pass-a lo um tah, Dima Hasao District Bifurcation thaw dinga ti chu sukpuitling ni ta raw seh tiin lekha khawm a lo thawn tah thu hai a hril.
Assam Government-in IPF hai demand 2019 Assembly a passed anga Practical a implementation a ni vat thei dan ding hin IPF le Assam sawrkar aiawa inbiekna neipuitu dingin Three Member Committee on IPF Demand indin a ni a, hi taka hin Pu Parimal Suklabaidya Cabinet Minister chu Chairman a ruot a nih. 28 December 2020 khan ama Chair-na hnuoi a hin inbiekna nei a lo ni tah. Chu taka thutlûkna minutes a ziek angin thla thum zoa inbiekna nei nawk dinga ti a nih. Chu sung chun GAD, HAD le Home Department haiin Official work popo lo siem fel vawng hman dinga inhriettir an nih. Amiruokchu, Assam Election le Covid-19 hrileng leiin sunzawm el thei ta loa umin a um a, tuta țuma inbiekna a hin ama Pu Dr. Himanta Biswas Sarma Chief Minister-na hnuoiah sukfel vat dinga ti a hung ni tah a nih. Hi ang a hung ni tah lei hin IPF a inthlungkhawm hnam tum tum hai, Non Dimasa hai beiseina insang tak a hung siem pek tah a nih.
