~Isaac Hmar
Awleh, ruolcham khawlâia ei inhmu chun, ê ruolpâ / ruolnû i dam mâw? Ie'm i thâw hlak a? tî ṭawngkam hi ei hmang tlânglâwn deu tak chu a nih. Sienkhawm, a hunga ei ngâituo zawm ta lêm chuong ngâi nawh. Ei inah in leng ei neia, ei thu tî tî lê hohlimna ding izirin, ei lo sawngbâwl el hlak. Thu tlângpui hril ding ei ni chun Sitting Room-ah hohlimin, thil ei hrilin ei hohlim hlak. Sienkhawm, ei hohlimna ding a thu izirin, mî hrieta hril el dâm remchang ta lo khawpa inril ani ta ruok chun, ei Zâlkhum pindanahai chen khawm ei ṭhuoiin ei hohlim bawr bawr el a nih.
Chu hai nêka thu inril lê ṭhen le ruol khuo leh vêng le û leh nâuhai khawma an hriet rem ta lo, nâuletehai tak ngiel i hriet khawm rem itî ta nâw thu hai êm chu; nûpa khuma zâl pumin dam te te'n an la hohlim a. Hriet inlâu pumin an hriet lo ngêi dingin tî'n, hun remchang an zawng ṭawk ṭawk el hlak. Chuong po pohai nêka inril a la ni lem chun; makhatin, tû bula khawm hril ngam lovin, Zân i mu khawm intuo thei hlêk lovin, an kawppuihai hriet tak ngiel khawm rem ti ta lovin an rûl tûr vawn hlak.
Aw leh, a chunga ka hung ziek ta ang khin, kei ma tâwka "EI RAM EI HNAM" hi lo invawi hlein lo rûl tûr vawn el hlak lang khawm,Nâupang el ka la ni a, tawnhriet lê thuziek tienga khawm mîhai en hin kâ'n sit ngâwi ngâwi a; mî kuoma hril suok ngam lovin, zân i mû khawm hun tam tak el chu kâ'n tuopui ta nâw hrim a nih. Ziek lang a mi theidâ thei ding dâm an tam el chun, thil suol lientak thâw ka ni el di'm? tî dâm chen ka ngâituona chu a pieng hlak.
Maktak elin zân khat chuh, Tirko Paula'n Timothe kuoma a thucha ang khan, " i nâupangna tû khawmin ngâinep nâw raw hai se," a ti ang el khan rawl ni chie sî lo le chieng êm êm sîin, Inhrietira umin. Chû zâr chau chun ka hung ziek ngam ta a n'a. A ziekin a lo zir nâw ani khawm a; a tiem lo thiem el dingin tiemtu ditumtakhai ka ngên chêu a nih.
Pathien remruot hi ka thei ang le ka tlin tâwkin ka sût hlak a. Mak danglam le ropui tî tamtak ka nei lâi a, ei hnam sûng thu bîk khawm hi hmun leh hmang khawpui le hnam lienhai ang hin inbengbêlna lem chu ei nei bîk dêr nawh. Sienkhawm, ei Pâ Pathien hnama mi siemtu ngêi chun, ei khatin hluo bîk nâw inlâ khawm "EI JERUSALEM DINGIN, TUIṬHAPHÂI" khi a mi lo remruotpêk leiin hlu ropui le lâwmum ka ti hle. State dang danga hai lo um darin, muol hran tlâng hran hrana um dar inlâ khawm, a mi suikhawmtu umna chu TUIṬHAPHÂI a nih.
Chuleiin, ei Lalpa Pathien kuoma ngêi chun Ropuina le Chawimawina um kumkhuo mawl raw se! Hei bêlchiengin hei sut chet chet ta hman û? a lo ni luo ie ti thei dingin, ei hnam sûnga Kohran po pohai GHQ (General Headquarters) tî thei ding khawpin ei um khawm, ei hnam sûnga Pawl chi tum tum; HSA, HYA, HWA lê a dang danghai General Headquarters chu TUIṬHAPHÂI vawng a nih. Chuleiin, Hmar khawvêlin annî khi ei entawn, ei inchûktirtu, ei ṭhuoitu, ei hotu, ei zirtirtu chu an nih chieng hle.
Chuong ani lei chun, an tlêk dân dân hi ei tlêk dân, an thâw dân dân hi ei thâw dân, an vâina tieng tieng hi ei hnam pumpui chun, ei fê dân chu a ni nâw thei nawh.
Chuleiin, a ko dân ding chintâwk ka hriet naw êm leiin, Pathien hnam thlang Isarel-hai khawpui Jerulalem angin kei khawma "EI JERUSALEM" ka ti tlawt el a nih.Tipaimukh biel a hin ei Hmarmî a tamtak chengkhawmna ani lei hin, MLA hi pakhat Manipur-ah ei nei thei hram a. Hmun dang hin ieng tin'm âw ei nei thei vê ding? tî hi ka hei ngâituo'n, ê ei Jerusalem (Tuiṭhaphâi) ruoma Hmar hai khawm ei nei a ṭûl ani tah.
Pathien khawm lungriltakin a hniin hni tlut tlut el tâng ei tîu, hun khawm a hun ani tah tî hi ka hung khek suokpui a nih. Ṭhenkhat chun, ei hnam po povin vote fâi vawng inlâ khawm tlingna change ei nei dêr nawh tia ngâi dân nei khawm um ei t'a, indik khawm indik mei a tih.
Sienkhawm, einî ei inthuruol phawt chun, ei sir le vêla hnam kâupeng chîtê tê hai hi chang dân lampui a um el nawh mâw? dâm ka ti hlak.
Ei hnam pum huopa ngâituona ei hei sêng tak tak châng hin chu; ring nêkin mî hnam a'n changkâng hrâtin Inthuruol vieu hai sien khawm, ei hnam ruok chu ei lo inhnuoi hrât hle nîin ka ngâi hlak. Ei Demand area Mizoram dâm sawh, ei san sanhai hei hrât pei el hlak inlâ chu, hî nêk hin hma ei sâwn met hrim hrim ka beisei. Ṭhenkhatin Tipaimukh biela MLA ei neisun hî a biel mî khawm ni dêr lo hin fâk dân lampui ei lo ngâituo vê sen hlak bawk.
MLA hai hlak chun; A biel sûng mî nêkin thilthâwthei lema ngâiin Sawrkâr-in scheme chi hran hran a siemhai biel hmasawnna dinga a tî hai kha, Biel dang mî ditsak lemin, kut le kê'n ei hei hmang tum nâwk bawk hlak. Ê, hieng ang zinga ei fê hin chu hunsawt ei dei ring a um nawh. Mi dapa intuklût hi ei hmabâk chu nî'n a'n lang. Mizohaiin. " HMAR VAR A'N HNU" an mi lo tî ku hih ei pî le pû a'nthawk tah vawisûn chen hin ei la thâw rawp el ding am a nih âw?
Ei zing hun dinga chuh. Thâw lul ta nâwng ei tîu khai! Thawro ṭhangruolin lungruolin hnam tâ ding hin inthuruola thukhat vuoin bei tak tak tâng ei tîu khai! A ṭha nâw le indik lo khawm sira ṭhul anga hnawl ngam dingin, inbuotsei tâng ei tîu. Ziek tiem le hrilmâwi el hun ani ta nawh. A tak taka thâw hun ani tah. Chuongnaw chun, ei pil hmang sawng el thei ding khawm a hawi ta ie!
Mi hmusit ding i ram i hnam i lâina nawh mâw? Ṭhuoitu ringumhai hung thosuok ta ro ie? Ei zinga hun ding hin, a lo nghâk chêu ani ta hi.
Sakhuona le Politics khawm hih ei thlîrna tukver khawm thlâkthleng a hun ta nawh mâw? Sakhaw mî deuvin mi a ditzawng tlawpa vote a zawngpui ei hriet chang dâm, Kohran rawngbâwltuin a mi ditzawng deu ṭawngkam khata a hei hrilmawi el hai dâm, En dân lê ngâi dân chikhatin ei hei ngâiin ei hei en el dâm hi chu ei lungril put hi a'n dik chie ta nâw deu ani nawh mâw?
Khawvêl so themphak sakhaw ṭhuoitu lê rawngbâwltu mi suongum lê inzaum tak tak hai, ei politics hi mi hung thlâkthleng pêk hram ta ûm? Ei sakhuo hin ei politics hi mi hung control ta ro khai. Chuong ani nâw chun ei pil inthûk taluo ding ani ta hi. Nangni pawl keini pawl tî hun um de hlak a tih. Sienkhawm, hnama mi siemtu, țawng mi petu, hieng chen chen mi'n tlung tirtu le ei hma tienga mi la ṭhuoi pei dingtu ei Lalpa Pathien hi a chunghnungtakah ei hnamin ei sie thei hmakhat mi dawm kang nâwng a tih.
Chuleiin, in pawimâw raptlak ani tah ie. Kohran sakhuo kaltu hai chu bendei ngam ta ro khai. Hnam Kohran le Politics an khuong ruol hun huna chu Lalpa'n ei hnam a mi châwisâng ngêi ngêi ding a ni si a. Chuleiin, hnam hin tlumte thlîrin a nih kan lo thlîr chêu.
Chuleiin, ei JERUSALEM a'nthawk hin hung parvûl ei t'a, ei chunga Lalpa a lâwm ani phawt chun Ram chu ei tâ ding a nih.
Ram le hnam hi i hmangai ani chun, Krista chanchin hril el rawh. Ram le hnam hmangaitu tak tak hai chun, Krista chanchin hi hril pei ei tîu. Tlawma ei rethei ding a lo ni khawma retheipui ngam ei tîu.
Ei hming a lo sie deu ding khawma; hming sietpui el ngam ei tîu. Chân a ṭûl khawma, Chân ngam ei tîu. Khawvêla hnam changkâng le hnam inzaum ei tihai hrim hrim, sakhuona le an politics hi a'n tlawn zat zat vawng a nih. Pathien zar chauvin ei hnam lem chu khawvêl sakhuo laia ropuitak Christien sakhuo zuitu 100% ei ni ani nawh mâw? Ieng dinga ei Sakhuo le ei politics hi inkal tlat ang deua ei ngâi am?
Hi hung inṭanna hi ieng lei am? Iengtik kara hieng thil hi ei hnam a hung suok el am? Sui tham a um chu tie mâw? Sakhuo dang dang ringa zuitu um sî lo mê a mak a tling a nih. Chuleiin, ieng anga lo sie tah khawm ni inlâ, ei HMUNPUI / Ei JERUSALEM a'nthawk a zung phâwi dawk ngam ei t'a, zung um ta lo chun, hunsawt a dai chuong awm sî nawh a. Hun el sien. Ka lâwm ie!
