Responsive Ad Slot

Zanril Laia Berampu

Thursday, December 22, 2011

/ Published by Simon L Infimate
By Joe Khawbung


Zanril Laia Berampu ~Rev. Thangngur

1. Zan ril laia berampu,
Bethlehem phula riekhai kha;
Van tieng thli ri’n a hung ṭhawng,
Ngai dingin an tho va.
Lawmna thil a hung hrang del del,
Angel rawl thangkhawka chun;
Mi tin ta ding inpak tlak Lal,
Krista piengna thu hrilin;

Hnuoi chunga rem leng sien.

2. Van Lalnau va en ta u,
Bethlehem bawngin sunga sawn;
Anriengnu Mari’n damte’n,
Ranthleng chungah an zal.
Chung si-ar a hung par sing seng,
Ranthleng laikhum zawn chungah;
Khawsak mivarha’n an hung zui,
An robawm thil hlu chawiin;
Lal chibai an hung buk.

3. Ahi a nih Van thu ril,
“Hnam tin, chi tin, intlanna ding;
A kut a kea kilin,
A nakah sun an tih.
Hringna tuiin hung luong a ta,
Aw kalvari tlang chungah;
Chun khawvelah luong dar a ta,
Zawlnei thu hrillawk angin;
Hnam tin sukdamna ding.

Hi hla hi Rev. Thangngur a phuok a ni a. Krismas urlawk zana a phuok a nih. Kristienhai hin kum khata ei tung em em chu Krismas hun hi a ni a. Hi huna hin chu mitinin hlim taka hmang ei nuom hlak a, a ṭhen ruok chun lungngaina niin ei hmang hlak bawk. Ieng po khawm nisien Kristienhai ta ding chun hun hlu a nih. Eini Hmar nauhai khawm Kristien ei hung nia inthawka ei ngai hlut a lo ni ta ti hi hla inthawk hin hriet thei a nih. Hi hla hi ei en chieng chet chet a Rev. Thangngur-in a lo hmu inril hle, a theology an thuk zie le Pathien naupa Isu Krista hung piengna thu a takin amaah a chang a ni ti ei hmu thei.

“Ranthlengah an inzal” Van Lal nau nisien khawm a hmangaina leiin ranthlengah a hung zal a ni ti a hril. Isu Krista hi Pathien a ni a, nuoi le vana thil um po pohai siemtu le chawilien tu le enkawltu a ni ti ei hriet, amiruokchu van Lal nau nisienkhawm a hmangai a siem mihringhai inthlanna dingin ranthlengah a hung zal a ni ti thu Rev. Thangngur hin a hril a nih. Khawvel ngaia chu thil thei lo hnu huol chu thil thei a ni ti a hung suklang a, lal nau ni si khawvela hin ranthlenga zal hriet ding an la um nawh. Ei Lalpa Isu Krista van lal nau ruok chu ranthlangah a hung zal a nih. Hi hla a phuok lai hin Rev. Thangngur hi lungriemin a thlak hiel khawm ring a um.

“An riengnu Mari” Isu Krista hung piengna dinga Pathienin a hmang Mari ngirhmun chen khawm kha Rev. Thangngur hin a ngaituo phak a ni chu tie. Van lal nau piengna nu chu mihaiin ngaisangin inza awm tak an ta, mitinin chibai buk awm takhai, amiruokchu chuongchu a ni der nawh ‘an riengnu’ a ni lem. Lungsiet a va um de e! Isu nu Mari kha. Inrieng ei ti hin mi lungsietum, hnemtuding nei lo, mihai dit lo, mi beidawng hrilnain ei hmang hlak. Chu ngirhmun chu Mari khan a hung chang a nih. Mihai ditnawin a um a, zana a tlanhmang pui a ngai a, beidawngna a tuok pui a ngai a, harsatna a tuok pui a ngai a nih. ‘An riengnu Mari’ a va ni ngei de!

Chuonga an riengnu Mari chawi van lalnau chu a zalna ranthleng chunga chun “chung siar a hung par sing seng a” tiin a hril nawk a nih. Lawmna tieng an nawk tah, khawsak mivarhai chun van lalnau chu chibai buk dingin an hunga a zalna zawna siar a ngir chun an luta van lalnau chu chibai an buk a nih.

“An robawm thilhlu chawiin” khawsak mivarhai khan an robawl thilhluhai van lalnau kha an inhlan a ni chu, a va ropui de aw. robawm el chau ni lovin chu robawm a chun thilhlu a um a, chu an thilhlu chu an inhlan a nih. Rev. Thangngur hin a hmu inril khawp el. Krismas hmangtuhai po povin mani robawm thilhluhai chawia ama chibai buk ve dingin a mi ngen a nih. Krismas ei hmang hin a hminga hmang el ding ni lovin ei robawm thilhlu (ei lungril) ama kuoma inhlan ve dingin a mi dit a ni ti Rev. Thangngur hin a hrilna a nih.

“Van thu ril” Isu Krista ranthlenga a hung zalna thu hi Rev. Thangngur chun van thu ril ti an buk tawp el a nih. A van dik ngei. ‘thu ril’ ei ti hi thu mei mei an nawh, thil pawimaw tak, thil thei lo dinga ngai, mihai ngaia thil ropui, mihringhaiin ei hrietthiem phak lo thil a tina a nih. Pathien lungril mihringin ei hrietthiem phaknaw thu le a thu chu inril tak a ni thu a hrilna a nih. Isu Krista ranthlenga a hung piengna thu hi mihringhai hin hrethiem phak naw inla khawm mihring ngairuotnaa ei ngaituo ringawt khawma thil harsa a va ni awm de. Pa Pathien ngei khawm a lungril a buoi hle ring a um. Mihringhai hmana ei nauhai thil ṭhanaw an thaw ding le an tuor ding ei phal naw ana, suolah lo tlu tahai sienkhawm nu hmangaina le pa hmangaina chun a la hmangai zing hlak ang hin Pa Pathien ngei khawma a naupa ranthlenga a hung inpieng tir el ding chu a ngaingam ring a um nawh. Amiruokchu eini a mi hmangai si a, iem law ding a ni tiin an ngaituo ngei khawm ring a um. Chul! ei tak chun a ni Rev. Thangngur hin Isu Krista ranthlenga a hung zalna thu hi van thu ril a tina san chu.

“Hnam tin, chi tin, intlanna ding” Isu Krista ranthlenga a hung piengna hi Juda hnam chau le hnam bing chau ta ding a ni nawh a, hnam tin le chitinhai ta ding le intlanna ding a ni thu Rev. Thangngur hin a hriet a, hlain a kheksuok pui a nih. Hmangaitu nei lo hnam le, mihai endawng hnam lo ni hlak inla khawm eini Hmar nauhai mihi ngaia iengkhawm ni lohai kha Isu Krista-a chun eiin leng vawng a nih. Daikil kara um ni inla khawm Pathien chun a mi hmangai a, ei hnam hnam riengmawl ni inla khawm Isu Krista hmangaina a chun ei \hang ve leiin a lawmna chu hlain a hung puong suok ta a nih. Khawlai hnam le chi khawm Isu Krista ranthlenga a hung piengna a chun a huop vawng. Judahai chun anni hnam chau Pathienin a hmangai angah an ngai hlak a, hnam danghi chu Pathienin hmangai ve lo angin an ngai hlak a, chu thu chu thudik a ni naw thu Rev. Thangngur hin a hrietchieng a, ‘hnam tin, chitin intlanna ding’ a ni ti a hril.

Hi hla hin a hawl kim khawp el ranthleng chau a hawl phak nawh a, Kalvari tlang khawm a hawl phak chu tie! Rev. Thangngur hi a thu a ril a, a awmthusuok a ngainobei a, Pathien hmangaina a hmu chieng a, a hlahai reng reng hi ei en chun Kalvari-a Isu Krista tuorna hi an hmai ngai nawh ti inla ei ti suol ring a um nawh. A bul le a tawp a hi hla hin a hril ti inla indik tak a tih.

Hi hla hi hla hlu tak el a ni a, van chena ei sawm ding hla a tlingin ka hriet. Khawvel um sung chu chuoi ni nei ngai naw ni a, Krismas a hung tlungin mihai lungrilah sin thaw thar nawk pei khawpa hla ropui a nih. Hi hla hi Hmar pa awmthusuok a ni leiin a sak an hawi a, a tluk a mawi a, a sak an hawi a, Hmar lunglai a them zar el a ni ei hang sak chu.
Bethlehem el chau ni lovin Kristienhai biseina a min nei tir a, Isu Krista a mi hmangaitu le ei ta dinga ranthlenga hung zal kha ei la hmu ding a ni ti khawm a min hriettir bawk a. Hnam danghai ta dingin hla ropui tling naw sienkhawm Hmar nauhai ta ding chun chatuon chena ei hla mawi le ngainuom ding a nih.
Don't Miss
© all rights reserved
made with by Simon L Infimate