Responsive Ad Slot

ICI Central Choir le NPT Central Choir in Futsal Fellowship nei

Tuesday, January 12, 2021

/ Published by Simon L Infimate

Saikawt, January 12, 2021, Virthli (ONP): An vanglai ni le an that lai ni a haia an rawl mawina po po insuoa Pathien inpakna hla hai saka hmun hran hran a rawngbawlna nei hlak le an youtube channel hai fethlenga  inpakna hla hring hring tak el hung thurdawk hlaktu, mi tamtak ta dinga thlarau malsawmna intlun rawp hlaktu- ICI Central Central Choir le Nehemia Prayer Team Central Choir hai chun January 11 zan 7:00pm- 9:00 PM hun sung khan Zawlpa Turf Ground, Saikawt ah hlimtlang takin futsal fellowship an nei.


Inkhel tan ani hmain ICI Central Choir Chairman- Rev. Alan L. Thiek-in an hun hai tawngtainain inhlanna a nei a, 1st match a hin nuhmei hai an inkhel a, ICI Central Choir nuhmei han NPT Central Choir nuhmei hai hi 3-1 in an hne a, 2nd match ah pasal hai inkhel a, physical fitness an nei tha el bakah an ball pet a mawiin hmu nuom a um hle a, hlasak chau nilovin thil dang khawm thiem an hau hle ti hriet thei a nih. NPT Central Choir pasal hai chu ICI Central Choir pasal hai lakah 5-13 in hratna an lo chang zo ta naw a nih.


Pathien inpakna hla hai saka rawngbawl tlang seng an ni hlak angin inunauna le inlaichinna tha lem a um nawk zuol theina dinga hieng ang futsal fellowship hi taksa insawizawina malamin an huoihawt ani thu Virthli palai an lo hril. Inkhel hi zo a niin Pu Lalruotnghak, Chairman, NPT Central Choir in hun khar tawngtaina neiin hun suktawp a nih.


Khawvelin hun khir tak a hmang mek hripui inleng vel kara hin ICI Central Choir le NPT Central Choir hin mihai thlarau nun chawm thei ding inpakna hla hai hma tieng peia khawm buotsai nawk pei dingin Virthli chun ditsakna an hlan bawk a nih.


Don't Miss
© all rights reserved
made with by Simon L Infimate