Responsive Ad Slot

Krismas Malsawmna (Matthai 2:1-12; Luka 2:10-20)

Tuesday, December 22, 2020

/ Published by Ralsun Hmar


 ~ Rev. Challienkung

Krismas hi Krista ruoiṭhe ti na a ni ang bawkin hi ni insera Pathien chibai buktu hai ta ding chun hringnuna thlarau tieng malsawmna tamtak phurluttu a ni rawpa. Chuleichun, hi hun hi a hung tlung hnaia, a boruok a hung inleng vela inthawkin beiseina inthuktak leh ei lo thlir hlak a nih. Naupang hai khawmin an ni tawk tawka an dit zawng thuomhnaw thar neina huna ngaiin an lo nghakhla ve bawk hlak. Chuonglai zing chun natna rinum tak tuor lei dam, thina nunrawng tak el ei lo tuok a, sungkimtaka ei hmang thei ta naw ding leia khawsawt le beidawnga Krismas hun tlung ding hawphur ngawi ngawi khawm ei um hlak bawk. Ani ni a chu, hi hun hi ei nghakhla hle ang hu in buoina taluo nei naw hai khawm, inzo zap le inpei zenzawna tlung hi chu hriet ding ei vang hle thung hlak. Thei nisien a ni hi la sawn hlat deu nuom ding awm ruok hi ei ni am a ni ti ding hin ei um chu tie. |henkhat lem chu Bethlehem tlung hmanlo, kumthar lawm huna tlung hman ṭawk ni awm tak ei um hlak niin an lang bawk.

Chuong sasa khawm chun Krismas hi a makna chu, ei tung em em hi ei hmang inhawina a ni chuong der naw a. Ei hawphur lawk em em kha Krismas ei hmang inhawi nawna khawm a ni chuong naw bawk. Asan nia ka hriet le ring dan a chun Krismas hi a beiseitu hai ta dinga malsawmna tamtak phurtu a ni tlat lei hi ni ka ring a nih. Tienlaia mi ṭhenkhat hai kuoma Krismas hi malsawmna a  ni dan tawite te in hang en ei tih.

Bethlehem khuo: Bethlehem khuo mi a ni nawa chu Bethlehem in Krismas malsawmna a dawng dan hrilsa lo thei lova ei ngai a nih. Lal Herod in a phut anga thiempu lal hai le Dan inchuktirtu hai kuoma Krista piengna ding thu an zawng khan zawlnei hai lo ziek, “Nang Juda rama Bethlehem, Juda khawpui hai lai I chintak naw tawp. I sunga inthawkin awptu a hung suok ding a ni sia, ka mi Israel hai vengtu ding chu”, ti kha an hmu nal el. Amak ngawt el! Bethlehem kha Juda khawpui hai laia chin tak nisienkhawm Krismass malsawmna Isu Krista piengna khuo ani lei tak khan khawliena tiem a ni pha tawp el a nih. Hi taka hin ei ni mi hnuoihnung, mi hai hmusit tawk chau, dai kilkara mi hai kha ei nia Isu, Krismas Lalpa a um tlat chun ama zar in mi lien eini ve thei tina a ni ve leiin lawm a um bek bek el a nih. Mi’n chu malsawmna chu a hriet suok pha pha chun a buoina le rinum tuorna hai hrefu ta lovin khaw-le-var hmu in lawmna maktak in an sip ta lem hlak a nih.

Khawsak mivar hai: Khawsak mivar hai ta ding khan chu Krismas malsawmna dawng kha a harsa cher cher ngawt el. Isu Krista kha a zawnga an zawng el na a khan anlo zawng suol deua. Chawktho lo chi lal Herod an chawk tho laklaw leiin buoina tamtak an tuok pha a nih. An ta ding khan hieng hi a ni chun tia lunghnuol a kir nawk dai a awl awm. Bethlehem le a sevela naute tamtakin an la thi pha nawk nghal. Sienkhawm, an ṭawngṭai nasa khawm ni rawi nawnim, a tira an ni ṭhuoitu Lal Arasi kha an hmu nawk hlaua, anzui pei ta leiin a tawpa Bethlehem tlungin, bawng in tlawma ran bupekna thlenga zal, Krismas neitupa Isu an va hmu khan, tlawma nuna ṭhuoi luta um in, naute Isu hma ah an bawkkhup a, an lawm luotin an robawm hai hawngin an nei ṭhat ang ang an inhlan el a ni kha. An kir nawk khawm in buoina lampui hraw ta lo dinga hrila an um leiin lam thar an hraw a, an kir nawk ta a nih. An khuo an tlung thu hriet ni naw sienkhawm an thil tuok le lawmna thua an Testimony kha ngai nuom um hleng a tih, Krismas malsawmna an dawng tha hle.

Berampu hai: Bethlehem phula beram venga phula riek hai khawm khan Krismas malsawmna an dawng ropui ngawt el ei hmar hla phuok tu’n “ van tieng thil ri’n a hung ṭhawng, ngai dingin an tho a” a lo ti angin Lalpa ropuina var, var tak le an kawla Lalpa hung ngir el le a thu hung hril an ngai tlak kha a ropui hle awm. Chu nak sapah, van Angel hai hlasak an la hei ngai thlak sa ta deu deu. Ei ni rawi chu ni inla, hieng po po hmua ei hriet ta hnung chu a Isu khawm ei ngaituo ring a um ta nawh. Nasataka hlimpui in khek indur ei ta, ei Pastor le Upa ha’n an mi ti deu lem chun  pawl dang khawm ei phun nuom pha hiel el thei a nih. Berampu hai ruok chun an thu hril an hriet kha a tak ngei hmu tum in Bethlehem pan in an fe ta vat vat a. An beram veng kha suonlam a hmang an tum chuong nawh. Mitin ta dinga Sandamtu, Isu kha hmu ngei tum in an fe vat vat el a nih. Entawn tlak tak an nih. Bethlehem an va tlung chun naute Isu, tlawm taka ran bupekna thlenga zal chu an va hmu ta a nih. Isu an hmu phing chun Pathien chawimawi le inpak pei pumin an kir nawk ta a nih. Isu an hmu dan Testimony hi an hril nasa ni ring a um. A hrie ta phawtin mak an ti tawl a nih. Krismas malsawmna an dawng naw ti ruol an nawh.

Thukharna: Krismas malsawmna bul Isu, Pathien nau pa hi a lo va ṭha de aw. A vawnna phing khawm in inpak a hlawa, a piengna khaw te khawm in a khawliena tiemsa ni in ngaisang a hlaw pha bawk. Isu  umna ta phawta Krismas malsawmna a tlung hlak. Siekhawn hotu pa Zakai in khawm khan Isu a tlung le inruolin Krismas malsawmna a tlung. Vawisun hin Krismas malsawmna chu nangma ah tlung a nuom. In insunga tlung a nuom. In kohran ah tlung a nuom Bethlehem khuolbuka tlung in an vai ang khan tlung in ei in vai tir dim a ni? “Ngaita, kawtkhar bula ngir in ka nawk hi, tu khawm in ka rawl hrie a kawt a hawng chun a kuom a lut ka ta, a kuom a zan bu fang ka ta, ama khawm in ka kuoma fa bawk a tih,” (Thupuongsuo 3:20) tiin Isu’n a ti a nih. Unau, I lungril kawt I hawng naw ding maw?

Don't Miss
© all rights reserved
made with by Simon L Infimate