~ Lal Dena, Columnist, Virthli
Summer vacation chu a bo nawk tah,
Sikul runa ‘present, Sir’ ti ka zuom nawh;
Winter vacation ka ngai vawng vawng,
Awih aw! Winter vacation ka ngai vawng vawng.
Summer vacation ei nghakhla em em kha a hung tlung tah ngei a. Ni tina ei sikul kaina thiembuk chu sik sik rieu an hram tah a. A suklumtu umsun chu aium chauh an lo nih tah. Chakravarti, Alzebra le Geometry buhai chu dit naw hnawkin dawkan kil tieng ei hei hnawk a. Home lesson lukham ding reng reng um ta lova, ei hei leng thaw veng dam kha chuh, vate a bawma inthawka insuo zalen ang el ei nih tah. Ei home lesson dang chu ‘vawizan tu’m ei leng ding’ ti vel chauh kha a nih tah.
Phur-leh-do thla a lo ni tah a, fur hun nisienkhawm khaw that thla var zan kha mi tinin ei thlak hla. Nuhmeiteha’n tuolzawla zawngkalera ti’n an lo insai kala, tlanglakte zakhat pawlin
Khuoi uo singa lut ta ta;
Khuoibel uo singa lut ta ta,
Pang uo zel dum; zel dum,
Pangpuipar uo, pangpar uo zel dum zel dum,
Thiem insut, thiem insut e,
Vailal pa thiem insut, thiem insut -
tiin veng tin an lo fang mek bawk.
Tlangval hawnkhatin tuol sawngkaa Thangi, khuo khat nunghak hmeltha, pat inding lai an lo thung ngha tuol bawk. Tlangval pakhat Awiapa zawngta bul sirsanin theihle a lo mut veng veng a; lengtul pakhat Vengthlabir panin kawlthei hna a zuk mut hler hler ri hriet thei a um bawk a. Khaw tieng tieng khawm hang ngha vel inla sumpuiin a changa thla a hlie ti naw chu, saiser le lamkhuong hnahai tle suouin an inlang a, tlangrama khawvel hi chu khuonu’n mawi zuol bik dinga a lo siem ning a tih ei tih hiel hlak.
A hmaa ei lo intiem lawk ang ngeiin ruolthahai leh lawm ei hei zui a. Mansapuiin bufun le chempui paiin tinhmuna lawmhai ei lo nghaka; an hung intak deuh chang lamsaka inkhieng thingkunga ngaizawnghai hming lamtawi dam chemin ei lo khen vel hlak kha tie. Lawmnu khawm fenar dum bilin feema ei tuolzakuo le tuthlawhai phurin a hung hnek hneka, an lova fe ding ni a ni leiin a hung inhnuh luih hram. Lo tieng panin eifeh, Pu T.Khuma’n a lo insam angin:
Zalam phei duoia di kan sawm,
Lawm lungruol kan hlim ngei;
Zotui thieng a lo luonga,
Siktui thala leng her mawi,
Zu ang kan dawn dingin.:
Zotui thieng khuonu’n dei huntawk chara a siem, lam sak rampuia inthawka hung luong thla kuta indawa ei dawn zovin, vadungte ei hei pal kai a, lawmnu a fenar hu inlauva a khuoivalawn inlang raka an hang hlim dam kha mitthlaa hin a bo thei tah nawh. Hlo thlo sawl chawmkhat hnunga lawmnu’n ziel mawite (lekhazuol) hung chawi malamin tui a hung sem a, inting rim inhnam hawka ei hang inkhiet pap pap dam, inkhieng thing tluon chunga thunga lawmnu’n fanghma a hung zel a, ral khata ngau ruolin ‘kul ruk, kul ruk’ tia inhram ngaithla zing puma ei hei fak dam khan chu, chantawka lung awi hlie hlie, sawl khawm ei hriet chang nawh. Lawm zui rem naw chang, mi-uhai leh ‘zantieng in tienga a’n lawi hmasa sa’n fanghma sulinthliek aw’ an tiha, lo lam the takah fanghma kelrang ngaidi chungah an hei hmuh dam khan chuh dawn a suktam a, hmawnglawnzai hla sukhausatu tak a lo nih. La to rawh, a hla chang zuk insam hiel ei tih:
Fanghma tuaitirte’n sawl a mi thliek,
Chang naw sienkhawm a chia sie ka nuam;
Vangnei thil thu’n a to el rawi mawh!
A va hei inthuk rem rem de! Fanghma tuoitir, a mu khawm la chang lo hriet awr awr, a chia hei sie tum chu!
E heuh! Hriet naw karin summer vacation ei lo hmang zo nawk tah. Lungdihai an kai ve si naw leiin, ‘mi’n absent-tir el rawh, di leiin’ ti pal a awl. Summer vacation zova sikul hei kai nawk kha chu, fanghma zam a zung phirtan ang el ei nih. Taksa class sunga um sienkhawm ngaituona le thlarau chuh hmun dang daiha a um a. Zirtirrtu’n ‘e plasi bi hawlthing sikhuer’a ti dam kha chuh naah a lut naw tawp. HCF/LCM le simplify zirtirtu’n blekbawta a chawk vel lai dam khan mani hming le mi-uhai hming dam ei lo chawktet ta lem hlak a. Arithmetic intak ei tih a, geography le biengno dawnkawp khawm harsa ei tih hlak.
Hun chu chel thei ni nghal lo. Kum tawp ekzam ei zova, ar khai khawmin ruoi ei the a, Thanthuompa in lien taka farewell meeting ei hmang a, BBC London Airport um le um naw hre phak lo, motor le rail lu khawm hmu phak lo, pawl khata thiem deuh khan Sap tawngin thu a hei hril a, tang kungin hapui inhil hukin ei lo ngaithlak hlak kha tie. Kha farewell meeting zana Pu Thankhum, Sakawrdai (Pu RH Hminglien pa), sierkawp thiema hrilin ukilele pera hi hla inhnak chapa a sak kha ka naah le ka mithlaah hin a la cham zing:
Khua hmun loh chu lungrunpui,
Tawh chang ni a reih ngei e;
I sakhming chullo par ang,
A vul reng ka thinlaiah.
Lungrunpui, nang zun romei ang,
Kian a rel love tang a bawm;
Ka ngaih zual kan nuhluite.
Inngaiin inthlakhla hle inla khawm, mani khuo le chetna muol tienga a zinga inthe a lo tul tah hlak.
“Winter Vacation Ma Ma” tia Tlumte thlir taka ei lo thlir chu ei zuk hmang tan nghal a. Bawngchal a hrui sutpek ang ei nih tah. Geometry le Commercial Geography-hai khan an mi chawkbuoi tah nawh. Lo zau tieng ei zuk thlir chun, lawmnuhai le summer vacation sunga bu kung kawng chen chauh chauh hai kha an lo hmin tuor tah. Putarhaiin lova ar phurna ding arbawm dam an lo ta mek, rabawkhai bawl zovin, lo riek dingin ei hei insiem nawk tah a. Rabawk bulah ruolcham le riekna ding pawlbuk ei hei inkuia, busik lai ruolcham le ei hang riek dam kha chu inhawih ve tak a nih. Zana ramtin ram tang titi bawraw sepin, a chang leh lemburte sitin thaikawi bawngte ei hang ziek dam kha chu busik sawl khawm ei hriet chang nawh. Khanglai huna raitingpet (lekhapuon) khawm kha a buong, kil khata rose par lim um ‘forget me not’ inziekna ngei, dakip khawm parte lim le “love” inziekna ngei kha ei hmang hlak kha tie. Tlangval thenkhat lem chun zana ruomeiser sitin lam rinum le tenbaram khawm pawisa lovin zau danga mi-uhai lo riek an va leng dam kha chu mei mei a’n nawh, sung tienga inthawk mawrtu um lei a nih hlak.
Busik zo a hung nih a, buchil a hung hun. Suorthlakah buchil tak tak khah. Sieli, puon lukhumin bupawl chip sa pei dinga Suorthlak sira a lo ngir zing bawk. Tlangval insukparapha’n Suorthlak insawi hlup hlupa bu an hang chil a, Sieli lactogen bur inthen ve hlawp hlawp dam kha chu……,hei hah! tu khawma ‘ka sawl, ka kham’ an tih ngai nawh. Bu sip zawn, kak zawn le silai zawn an sik chang lem khan chu, an ha ruok a’n lang el. Tien lai chu khang anga bu an hauh tum, fapang inzawm (bu thar an sik hnung khawma bu hlui la um zing) an nei tumin Sikpuiruoi ni sari sung dam chenin nunkhuo an lo pham hlak.
Hei thlir vel inla, lo lam sir le khawhnawmhaiah tlangsampar an lo vul chuoi el.
E heu! Hei en ta, biekin chawr tieng sechal Parkhuong khuoa inthawka hung kei sawngka sira hmuk thing bulah an thlung ruou ta saw! Lanu ruolin biekin dithlafarfem pheia Kana khuoa ang el khan sumbelhaia tui an sungsip vawng tah. Tlanglakteha’n hnachang hna tel Kum Thar lawm chen daih ding an lo bil hnur ta bawk, Pulpit le biekin kawtkharhai khawm lekha mawi le uileiparhaiin an chei mawi mek ta sawh. Tlangthanglien-hai pansak zawla sawlfang tuoitha phun le pawl bang dam sawh I hmuh de maw!. Lengkhawmna hall thungna le meipuia sem ding thingtum tlangvalha’n an bil rum ta bawk. Kristmas le Kum Thar lawmna ding nunghak tlangval thingphura fe dam kha, a tlukpui hril ding a vang.
Urlawk zana fak ding in tinah kawnglawng buman an lo suk seng bawk. Inkhawm tin mi-uhai ina muong changa bei fak zova, lengkhawm hall thlikhawnvar hnuoia
puon inkeizawm a:
Jeho-Jire tlanga mihai chun,
An chang ngei ding a nih;
Salem puonzar hnuoi a,
Haleluija, hlimin inpak ei tiu;
Van Lal Jubili chu-
tia ei hang sak dap dap a, meipui intek seu suou bula pitar-putar hlim le lawma an lo lam der der dam khan chu urlawk zana inthawkin khawvar ei cho nghal hlak. An khat tawkin ruonovin thingpuisen an hung sem deuh zing bawk. Pawitawklo khawvel 9 world of innosenc)-a cheng ei la nileiin, “Kan kut inrieng hi Mari kut angin ngai la”ti lai vel ei hang saka, kut lum tata mi-uhai kut ei hei hmet sawk bak kha iengkhawm a sap ei thaw ngai chuong nawh. Tu lai thangthar ruok chu Sappui nun entawnin, an hei inhmu le inruolin an inkuoa, chewing gum se an inchu nghal hlak. Mak thei ngei!!
A dei hun tawk tah bawk, nisa suok le var khawm hi huna hin chu a mawi zuol bik ning a tih, Pu K.C Lalvung (IFS Retd) meuh khawmin “Sikni Eng” ti’n zaiin a lo inawia, “Tleitir sakhmel khawmin a cho naw che, thing tin zarmawi, par mawi tinreng le rawng mawi in suo hai hi Sappui kut themthiemna khawmin a cho zo naw che” ti’n hieng hin a lo insam kha tie:
Aw khawvel mawina Sikni Eng,
Ka fak seng lo’ng che lungmawlan;
Nang hi I ni em Remna-
Lal fa pawh khan a rawn pan?
Mawi a ti luot leiin, Remna Lal hung pieng hun ding khawm, hi hun kher kher hi a hung thlang a mani aw a lo ti hiel. Ei hunpui laia pawimaw tak, kumpui lingleta ei lo tung Krismas le Kum Thar lawm hun khawm a ni leiin, WINTER VACATION MA MA.
