~ Rev. Huolthangsei Ţhiek
Thuvarhai 6:6-8, “Nang thabo, phaivang kuomah fe la, alampuihai ngaituo la, var rawh”; 6: 9-10, “Aw thabo, ieng chen am I zal ding a na? I zalna a inthawkin iengtik am I tho ding a na? Zal dep bek, in dep bek. Ch.6: 11, Chuongchun inru angin I pasietna chu hung a ta, I tlaksamna chu mi ralthuoma inthuom angin hung a tih.
Pi le Pu thurosie a chun, “Taimak mitinin an lawm, kawngin a theida” an lo ti hlaka, chu thu chu Buhmasa a khawm laksawngin a lo um a. Pathien Thutak hriet hma dai khawmin, Taimak ṭhat zie le mi taima hai chu mitin ngainat le lawm an lo ni hlak ti hriet lar a lo nih. Mani le mani inṭhangpui peilo chu mi dang khawmin an ṭhangpui nuom ngai naw tlangpui hlak bawk. Mi thabo, mani ta dinga sin khawm thaw peilo nek chun mi taima, mani ta dinga sin taima taka thaw, a hung harsa pal khawm a, mihai lunginsiet a phur lem hlak a, thangpuina a dawng lem bawk hlak. Mi zawmthaw le mani ta dinga sin tak ngiel khawm thaw peilo chu a hung harsat huna khawm, a tha a bo bek an nawm, an ti san dai el hlak.
A chunga Thuvar hai ei tarlanga a inthawk khin ei Pathien ditzawng chu mi thabo nekin mi taima mama chu a nih lem ti a chieng a. Pathien mizie ei inchuk dinga pawimaw ve tak el pakhat chu taimakna hi a lo nih. Iengtik lai khawma, thil thaw ding, a hun taka inkhelpui ngailo chu ei Pathien hi a nih. Chuleiin, ama angna neia a siem mihriem khawm taima taka sin thaw dinga induong ei nih. Sin thaw peinawtu chun a fak khawm fanaw raw sen, ti a ni angin, sin thaw peilo chu Lalpa Pathienin a nghei khawm a phal a nih. Thabo chu a pasie khawmin an hmel hlie hlie hlak a lo nih. Mi taima ruok chu a harsa a, a tlasam chun mi makti a tling hlak.
Rannung hmusitum tak el “phaivang” hai kuomah, taimak inchuk dinga Thuvarhai ziektu’n mi thabo a hei tir el hi chu, kawngkhat ngaituo chun, thangtlawm um tak chu a nih. Phaivanghai kuoma inchuk ngai hiel khawp a thabo hang ni el chu, a tlawm thlak khawp el ding a ni hrim a nih. “Aw thabo ieng chen am I zal ding a na? I zalna a inthawk iengtik am I tho ding a na?”. Tleirawllai, zingtho peiloa ei um chang, ei Nu han, “Tho ta rawh” an ti ringawt hman kha nakawra hin a cham zing hlak a, lung a ṭhawng zawk zawk hlak a ni kha.
“Aw thabo, ieng chen am I la zal ding a na? tia a mi keithona rawl inṭeng ṭhawk el hi a ngai chu a hadam naw chieng a nih. Ei lungril a ṭhawng dawt a, ngaituona a fang rum rum el nilo am a nih? Hi lai thu hi hang ngaituo chun, damsung khawsakna thila ei ngaibel nghal seng ring a um. Ni khawm a ni hrima, damsung thila ding hin taima taka sin thaw a fa dingin ei Pathienin a min chuktir hrim a nih. Thoboa um dinga siem ei ni nawh a, sin inrim taka thaw a, fa dinga ei pi le pu Adam le Evi a inthawkin inthlasawng vawng ei nih.
Mizie le pieng dana a thapinthir deu le zawmthaw deu khawm um ei ta, amiruok chu mani ta dinga sin taima taka thaw a fa ding le nei thei ding chau ei ni seng a nih. Mani ta ding baka, mi rethei le harsa hai ṭhangpui theitu dinga ei Pathien-in a mi beisei khawm ei ni hman hman a nih. Zal dep bek, in dep bek, a la ti sa peia, thabona hmangruo a nih. Mihriem piengphunga hin la hang insek hreta, muongchangna le zawmthawna hi a lo um thei khawp el a, chu chu hmun inkienlova, thil thaw ding ṭul chu put phat phat, tan phat phat ding, tina niawm a nih.
Kut sinthaw hai ta ding chun ei chang thlang khi a man thiem inhawi tak el a nih. Amiruok chu, lo sin thaw ve lo, a bikin khawpuia cheng hai ta ding chun, inrem thlapa inngaibel a awlsam naw el thei bawk. Nisienlakhawm, ieng ang sin thawmi khawm ni inla, thabona le taimakna a um senga, a ieng lem lema mani chu ei um seng a nih. Mani sin thawpeilo chu thabo ei na, mani sina inhnika, thaw pei hlak chu mi taima chu ei nih el a. Iengkhawm nisien, thabo le taimak kawnga mi haiin an lo hriet dan le Pathien hmu dan ah an nghat nawk a. Mani taima a inngaina le min taima an ti, Pathienin taima a ti ve um an ta, min thaboa an ngai khawm, Pathienin taima a ti ve an um el thei bawk a nih. A san chu, Pathien inkhina le mihriem inkhina chu an angnaw bawk sih a. Mi taima, Pathien lawmtlak ni chu ei thu hril nuom tak chu a nih.
An naw leh, mihriem ngaia taima ni ding chun, ieng ang chena taima am ni tang an ta? Pathien hrieta taima ni ding chun, ieng ang taimakna am ni tang a ta? Kawngkhat ngaituo chun, mihriem po po hi thabo ti bik ding pakhat khawm an um nawh, an ti hlak a. Pa pakhat chu a taima em em a, nitinin a dam phawt chun, sin a thaw hlak a, a sawl thei khawp el a. Nikhat chu in a um ve ta laklaw khiet el a, chu ni chun, in um chu a peinaw khawp el a, ina thaw ding hai kha ama thaw pei chi kha a lo ni ta naw bawk leh. Ama ta ding chun, loa sinthaw chu taima takin a thawpei a, ina sinthaw ruok kha chu a pei naw zawng tak a lo nih a.
Annaw leh, chu pa chu mi taima a tling tak tak ding am? Inhnik zawng, thaw nuom zawng, taimakna bik nei, taimakna kawng khat chau nei dam hi ei Pathien inkhina zawna taima an tling thei ding am? Chuong ang zawnga ngaituo chun, sin thaw pei si lova, mi ta inruka nei ve tum el khawm khawvel a hin an tam a nih. Inruk ding zawnga, mi hmunaw inchana, zanril a suok dam chu an taima nawk ang lawi si a. Mi taima mitinin an lawm, kawngin a theida, a ti ang thlura hang belrem chu a buoithlak nawk ang lawi si a nih.
Chuleiin, ngaituona inbuontir zawnga hril ding nisien chu, khawvel mihriem hrim hrim taima naw an um der nawh. Sin thawpeilova, sunnithlaka zal pei pa khawm a taima a nih ti thei dan a um ve tlat a nih. Damnawna nei ni si loa, sunnithlaka zal peilo an tam em el. Mi pakhatin a thaw peilo kha mi dangin a thaw pei zawng tak a lo ni thei a, a ṭha le sie chu thukhat nisien, taimak inkhina dinga chun, mi po po an taima seng a nih. Misuola ngai taima tak tak an tam, an sinthaw nuom zawng khan taimakna ṭha an phurtir naw mei mei a nih. Thilṭha a ngai thawpeitu chu a tlangpuiin mi taima ei inhlawtir a, thiṭhanaw thaw tiengpanga inhmang hai ruok chu, sinṭha thaw peilo, thabo ei inhlawtir hlak bawk a nih.
Chuleiin, Taima ni ding chun, Ei Pathien lungtuok zawnga taimakna hi um bik ngei dingin ei ring phawt a nih. Mi ta ringsan a fak tumna chu taima vieu sienkhawm, Lalpa Pathien lawm a tling naw ding a nih. Mak ve tak el pakhat suolna rawngkai thaw tieng panga taima tak tak ei khawtlang ah le ei rama hin an pung bek bek el tah hi a nih. Mani ta ni der lo ramhnuoi, loa dam fe a mi aithing lo va cho pek ringawt dam hi an taima tawp a nih. Mi thil inru dinga zan ṭhanga, mi inkara, invak vela, mi thuomhnaw inruk dam an va hei taima char char de aw ! ka taimak peinawna chi tak a nih.
Pathien mithmua taimakna chu ieng ang chie am ni tang a ta?, I sinthaw dan a khan, Pathien a lawm tak tak ding am? Rukru taima ang mei mei dam, a thatieng nek a, a sethienga mi sietna ding zawnga, taima vieu el dam I lo ni el am? Min an ngaisang zawng a ni leia, Pathien ram rawngbawlna hrim hrim dam, mi mithmua miṭha anga inlang theina hnawt leia taimakna dam, a thawṭha ie, an ti inchan kuka taimakna dam, mi inpak hlaw nuomna nei kuka taimakna dam; chuongang taimakna chu ei Pathien lawm zawng taimakna a tlingzo ding am?
Mani inchawimawina ding zawnga taimakna dam, mihai hrietlova ieng thaw nuom bar loa, mi hriethawia taimakna hrim hrim dam, chuong ang chu Lalpa lawmzawng a tling chie ding am? Mi hai sukhmutu dinga inngaia, mani thilthaw ṭhat hai mi hrieta puong suok le taimak hlawna ding melkai zuk zuk dam, Lapa lawm a tling ding am? Thaw nuom zawng le thaw nuomnaw zawng nei zinga taima dam, Lalpa inkhina hmawla a tling ding am? ti hai neu neu hi Kristien puitling hai chun, ngaituo le hriet fie a va ṭul ta awm de aw, ti ka ngaituo hlak chu tie..!
Taima vieu si, lungawina hmu der lo hai hi te, Lalpa mithmua taima an tling ve ding am? Mani ruol le pai, sung le kuo le unau hai dam, an umdan enthlit deu zinga, taima taka sin chu thawin, lungawina reng reng nei bawk lo, chierna le mi dang hai sawiselna chu saksuok zing bawk, mi inkhina nei zinga, taima nisi, hlimlo, Pathien inkhina zawna dingin mi taima a tling ding am? Chuong ang taima chu mi lungsietum tak an nih. An taimakna a khan lawmna reng an nei si naw chun, an sinthaw taphawt kha suok sinthaw a thawin, mani sinthawin an thaw naw tina a nih. Chun, an sinthawna kha thafanna leh a nih si naw chun, an taimakna khawm chu an fuknaw chu a um tho tho a nih.
Ei Pathienin, khawvela ei umsunga ei sin ding a mi pek seng a, chu chu Pathien a inthawka ka chanvo a nih, tina chang ei hriet chun, ieng sin khawm lungawina le lawm puma thaw thei vawng a nih. Mani chanvoa, ei thaw dinga ei hmazawna Lalpan a mi ruot pek ei hriet chieng pha pha leh, thafanna le lawmna a um a, thil harsa khawm hlim puma thaw thei a nih. Lapan ei sin dinga a mi ruot pek chu, Insung sina inthawk, khawlai ah, khawtlang le Kohran a dam, pansak, panthlang le kar, sung le kuo, u le nau inkara dam, thil thaw neu neu hai hi sin bituk an ni thei vawng a nih.
Lalpa mi pek sin ei hrietchiengna hmun hmun a, hlimna le lawmna a umsa pei hlak a lo nih. Lalpa a inthawka pek I sin I hriet chieng po leh lawmtakin thaw thei el I tih. Chu chu, inhlemsan el thei khawm a ni ngai nawh a, hlim le lawm taka thaw a ni hlak. Amiruok chu, thawtheina le zotheina chu Pa Pathien kuta a um, I intlar vena kha Lalpan a dit a nih. Nisienlakhawm, thil pakhat ei hriet zing ding chu, Lalpa Pathien in a mi hmang nuoma chu a mi mamaw chu a ni der naw a nih. Ei ṭhanglovin iengkim a thaw thei, a lunginsietna zar chauin, a sina a min ṭhangtir lem a nih. Chuleiin, inhawk taka, iengkim, ei chanvoa inhlan ta chu phursuok dingin mani inphal hlak ei ta, a thawtheina le zo theina chu Ama, Lalpa kuta um a nih.
Ei hrat lei le ei thiem em lei an nawh, a lunginsietna zarin a mi sandam ang bawkin, a lunginsietna zar bawkin a sina a min ṭhangtir a nih, ei lawman ding a la siem nawk ta deu deu.. A I ditsakna hi ieng ang lawma nasa am a na, ti ngaituoin, I sina taima takin thaw el rawh, ti hi ei thupui chu a nih. Lalpan Malsawm raw sen che..! AMEN.
