~ Rev. Lalkhamlien
Titanic Lawng mihriem 2208 lai zet phurtu nia an hril
April 15, 1912 zingkar khawvar tawma North Atlantic Tuipuiah a pil a. Lawnga
chuong mi 2208 lai hin mi 705 chau him damin an suok a. Mi dang hai po chu
Tuipui inthuktakin a lem zo vawng a ni kha. Tuipuia a pil mek lai khan a bul
hnai lai lawng pathum an lo um ve zing.
Titanic Lawng kha:
Khang hun lai khan khawvela Lawng lientaka
hril a nih.
Pound Million 7.5 man nia sut a nih
Titanic siemna a khan mi 15000 laiin sin
an thaw nia hril a nih.
Sanhimna Lawng 64 um dinga induong a ni a,
amiruokchu an inzin suok khan Sanhimna lawng 20 chau a phur nia hril a nih.
A sunga chuong mi 2208 lai khan mi 705
chau damin an suok a nih.
A mihriem phur zat le a thi zat hi hril dan an ang naw nuol.
A Lawng hi khang hun laia ding chun a țha thei tawpa
ngai a ni a. Titanic chanchin ziektu țhenkhat lem chun Lawnga chuong nuhmei
phakhatin ei chuongna Lawng hi a pil thei
naw tak tak a ni? ti’n an dawn a, Lawng captian Edward John Smith chun Pathien khawmin sukpil thei naw nih,
ti’n a dawn a nih, ti’n an ziek nghe nghe. Amiruokchu, a vawikhat inzina chauin
inzin nawk ta ngai lo ding le khawvelin a hmu nawk ta ngai lo dingin mihriem
tamtak hringna leh a pil hmang ta dai a ni kha. Titanic Lawng chanchin hi kawng
dang danga ziektu an tam em em a. Tuipuia a pil ding lai khan a kuom hnai lai
Lawng pathum an lo um ve zing a. Amiruokchu, an ngaisak dan ruokchu a danglam
seng. Ringtu, kohran hai hi thlarau bohmang mek le mi’n harsatna an tuok ei
ngaisak dana hin a ieng Lawng hi’m ei ang tak lo hang en ei tih.
Samson: Titanic lawngin
tuoksiet a tuok lai khan lawng pakhat Samson
an ti chu mel 7 vel chaua hlaah a um a. Titanic lawnga inthawka Flare (Flare = Kap-eng hi tupuia Lawngin sietna a
tuok huna mihaiin an hriettheina dinga, țhangpuitu, sansuoktu ding kona dinga an kapsuok hlak a nih) an kapsuok khawm
chu an hmu a. Nisienkhawm, anni lawng kha danin a phal lo, Seals man dinga
inthawksuok an ni leiin an ți a, Titanic lawng um nawna tieng chun an in her
liem san ta lem a nih.
Thil indiklo le thil țhanaw thawtu chun an nina le
thilthaw hai an inzapui a, mi dang hai hriet ding an ți hlak leiin țhangpui
ngai hai țhangpui dinga in pensuok ngam lovin inbik hmangna ding an zawng lem
hlak? Pathien rama ei rawngbawlna daltu
ding setan hmangruoa inchang thei nun le thilthaw lo dingin fimkhur ei tiu.
Californian: Hi lawng hi Titanic
umna a inthawka mel 14 a hlaa um a nih. Titanic lawnga inthawka Flare (Kap-eng)
an kapsuok khawm chu Lawng Captain chun a hmu a. Nisienkhawm, an lawng chu vur
tlang lien taktak in an huol a zan inthim laia zuk tlanna chi ni’n a hriet naw
a, khuo an thim ta bawk leiin zing khawvar hun nghakin an zal san ta lem a nih.
Hi lawng hin chu tuta ngihmun a hin chu thaw dan ding a
la um nawh, thawthei ei/ka nei nawh. Ngirhmunin a la zirnaw em leiin hun țha le
remchan danga ding la nghak hri phawt el ka/ei tih. Missionary suport ding
khawmin insung/kohran ngirhmun in a la zir naw a nih, tia mi harsatna tuok hai țhangpui
neka nghatsan tu hai le hi Lawng hi an in ang hle. Mani remchang hun nghaka
rawngbawl tum ringtu le kohran hai ngirhmun ang ang ni mei a tih.
Carpathia: A Lawng hi Titanic lawng umna a inthawka
mel 58 a hlaa um, Lawng pahni hai nek daia kar hlaa um an nih. Titanic lawng
hlat zawnga intawl mek an n’a, an lawng Radio a inthawk țhangpuina beisei,
beidawng thlaphang khek ri (distress call) an hriet chun. Lawng Captain chu
dingțhațhuon in a țawngțai nghal a. Inhmaw taka lawng chu herkuol in, hrattakin
Titanic lawng umna tieng pan chun a lawng chu a tlanpui ta vut vut a. A hmun a
va tlung chun thina tuipui in a lem mek mi 705 hringna a va sansuok hman a nih.
Anni hi Titanic lawnga inthawk hring dama suok um sun an nih.
Zing khuo a hung var a, Lawng captain chun an hungna
lampui a zuk en chun mak tina in a sip a. Vur tlang lientak tak kara chun
iengtin am a lawng chu hi hmun hi a hung khal tlung thei bik a? ti chu a hriet
bik naw a nih. Tuin amani ka lawng hi a mi khalpui a nih, a ti tawp el an tih.
Hi lawng hin Titanic lawng umna hmun a va tlung chun thi hmabaka um mi 705 an va sansuok hman a nih. Hi hin midangin harsatna an tuok laia Pathien kuoma tawngtaina le țhangpui nghal hlak tu, mani hringna ngaituo lova midang hai sansuokna le țhatna ding nun phal, midang hai ta dinga hringna chan ngam lungril, mani nek midang hmakhuo ngai ngai hlak mi hai nun chu hi lawng hin a suklang chieng. Mani tlinnawna suonlam neka Pathien felna ringsana rawngbawl, mani remchang hun, kohran burip hun nghak neka Pathien lungril ințawmpui a mihai sandamna dinga Ringnaa pensuokhai hi Pathienin a ensan ngai naw zie hi lawng hin a suklang hle.
Eini ringtuhai hi hieng Sampson le California lawng ang hi ei ni
pal el am? Midang in harsatna an tuok laia tlansan hlak tu ni lova, midang
ngaisakna nei lova mani sahimna ding chau zawngtu ni lo va. Carpathia lawng
anga Lalpa ringa midang hai hmakhuo ngaia țhangpui ngai hai țhangpui hlaktu ni
dingin Lalpa’n a mi ko a nih. Chu sințha thaw ding chun mani in en lovin, sum
le pai le khawvel thila innghat lova Pathien chau ena, ama ringa pensuok dingin
Lalpa’n a mi ko a nih. Thinaa țhuoi hmanga umhai chu sansuok la,
that dinga inzosa zinga umhai chu chelkir rawh. (Thuv. 14:11)
