Responsive Ad Slot

HWA GHQ in Hmar hnam puon Mask a hmang a khap chu HWA Assam Hills in a pawm nawh

Friday, November 6, 2020

/ Published by Simon L Infimate

Haflong, November 6, 2020, Virthli(ONP):  Hmar Women's Association GHQ in Face Mask (hmâituomna) a hmang khapna thupuong a siem a hnuoia ang hin inhriettirna le ngenna siemin an pawm naw thu an puong.

----------------------------------------------

Inhriettirna le ngênna 


Hmar Women's Association Gen HQ in Hmar hnam puon a Mask siem le hmang a khapna chungthu ah, Hmar Women's Association, Assam Hills chun; tarik 6th Nov. 2020 zing dar 8:00 Am  hin  Hmar Students' Association JHQ  le Hmar Youth Association JHQ  palai fekhawm hai leh chiphier taka ngaituo a ni hnungin; Mobile Cover, Mansapui, Mansate, Necktie, Zakuo, Belt, Scarf le a dang dang a hmang zing  hai khawm khapna dân um si lova, hrisêlna  dinga hmang ṭangkâi em em le nal bawk si Mask (hmâituomna) hmang a khapna thupuong an siem hi: HWA Assam Hills Hills chun a pawm nawh ti a puong.


HWA Assam Hills hi HYA, HSA hai ang hin, General HQ a nei ve nawh, Assam Hills Region pumpui hi Muolhoi HQ niin, Motto, Flag, Constitution a nei, HQ ṭhuoitu ding hai chu Unit tina palai fekhawm haiin an thlang hlak, chu pumpui chu, Hmar Inpui Assam Region hnuoia inkhâi a nih.(HWA Assam Hills hi,HWA Gen.HQ leh inzawmna nei naw sienkhawm; hnam khat, unau eini leiin a ṭûl chun, State dang dang ah khawsa in, dân le dûn hran hran khawm lo nei inlakhawm, hnam thila ding chun inhmang tawn thei nawna ding san a um chuong nawh). 


Chuleiin, ei hnam puon zierâng mawi tak hi, India hnam puon le ram changkâng lem haiin International level chena an hnam  thil an châwilâr le tangkâi taka an hmang angin, eini khawm chi-ai lovin, a lo hmang tah le hmang nuom hai ta dingin hmang thei a nih, ti ei puong. 


Chun, ei ram sung ah Covid 19 hripui leiin a ram phêkin harsatna tamtak ei tuok zinga, hnam pum huopin  Pathien hma ah hang tlu lût nâwk in la ti a nih a, a ruol a Pathien kuoma ṭawngṭâina hun dingin: tarik 8.11.2020 (Pathien ni) zîng dar 10AM_ 1:00 PM ni'ng a tih. A hmun ding chu mani in sung le remchâng ang peiin, sorkar le khawsung thusuok zawm zing puma thuawi taka hun hmang seng dingin ei inhriettirin ei inngên tak zet a nih. 


Sd/-

Pi Lalropui Hmar

President. 


Sd/- 

Pi Hnemi Tuolor

Gen. Secretary 


Hmar Women's Association, 

Assam Hills. HQ:Muolhoi




Don't Miss
© all rights reserved
made with by Simon L Infimate