CCPur, August 28, 2020, Virthli(ONP): Tuithapi khuoa August 26, 2020 nia thlitlung le inzawmin Stanley Hmar, Secretary, Information & Publicity, HPC (D) Gen Hqrts chun a hnuoia ang hin thusuok an suo.
___________________
Government of Hmarram
Hmar People's Convention (Democratic)
Serve the Nation
General Headquarter: Sinlung
PRESS RELEASE
28th August, 2020
Tarik 26th August, 2020 (Nilaini) zantieng dar 5 vela Tuithapi khuoa ramri buoina le inzawmin HPC(D) Manipur Region (L.Sanga Hmar Gang Group/Hnam Pasalthahai ralna suma thisen insuo zawm tuma hmalatu) hai chun mipui hriet dingin thukhel nasatakin an thedar hi dawntlak a ninaw lai zingin, hrilfiena hi ang hin HPC(D) General Headquarter chun a siem a. Media khawvela hin thukhel phuok fawma inhrilfiena hi mani mawng hlimna a nih ti Sanga Gang Group hin hre mawl raw hai sen.
Mr Michael Lalremruot Lungtau @ Michael Hmar inrawina a (Mr Lalthansang Pulamte @ L.Sanga Hmar Faction, HPC(D) Manipur Region, Gang Group) hai chun Tuithapi khuo mi Mr. Nanglunmang ina va lutin vauna le silai hiel kap puokna a nei hi HPC(D) General Headquarters chun pawi a tiin, a dem takzet.
Tuithapi khuo hai le Mr Lalremruot @Rema s/o (L) Hminga of Muolvaiphei hai pahni hi ramri chungchanga buoina lo nei ta hlak an ni a. Mr Lalremruot hin Mr Lalthansang Pulamte @ L.Sanga Hmar Faction (Gang Group) hi a ruoi ta a nih. A ruoitupa Mr Lalremruot chu tu chen hin HPC(D) Manipur Region haiin Thingchawm tieng hrentang ani thu a nuhmei Uniky Lalneitha bau ngeia inthawk khawma hriet a nih.
Chun, HPC(D) Manipur Region (L.Sanga Hmar Gang group) hi 2018 kuma pawlthar an ni a. Hi pawl hin Hmarbiel abik takin, Tipaimukh le Vangai a hai mipui chan-ai, Job-Card le Sorkar Scheme chi dang dang sukbuoi rawptu, a ram product mimal-in an fakzawngna, hmunphi le Aithing chena Tax la hlaka harsatna le buoina siem hlaktu an ni a. Chu chau chu dittawk loin an aihnaphapui Hmar Pasaltha famtahai ralna sum hmanga ralthuom inchawin, Hmar thisen insuo zawm pei tuma hmalatu khawm an ni bawk.
HPC(D) chun, Hmathlir seitak neia, North-East State haia Hmar nauhai chengna hmuna Hnam hmasawnna le hamthatna a buoipui laizinga Mr L.Sanga Hmar-in, mani tanghma chau thlira Central le State dawrin, HPC(D) hming hmanga Suspension of Operation (SoO) Signatory a nina hi puhai ro ang ela kengkaw tuma hma a lakna hi HPC(D) General Headquarters chun a pawmnaw hulhuol-a. Chun, Unau Zomi Group (ZRA/ZRO) hai kar le hnam tum tum inthlungzawmna United People’s Front (UPF) sung chena inthedarna chi ditumlo tak thea hmalatu khawm a nih. A hmalak dan po po hi mipui khawma hnam damna khawp a tlingzo nawh ti hrea thanghar dingin pawlpui chun an nuom takzet.
Chuonglai zinga Unau Zomi Group (Paite Tribe) Tuithapi khuo hai chunga hmalakna ditumlotak an nei ta pei hi pawlpui chun a ngaimawi hle. Hun sawttak unau Zomi hai le inlaichinna thatak neia, hmalak tlang ani lai zinga hieng anga unau kara buoina suok thei ding zawnga hma an lakna hi hmatieng peiah sunzawm nawk ta lo dingin pawlpui chun a nuom tak zet.
Chun, Tuithapi khuo incident le inzawma inrawlna neituhai hi Suspension of Operation (SoO) Ground Rules bawsietna ani leiin, Sorkar tienga Law & Order kengkawtuhaiin an phutawk hremna pe ngei dingin pawlpui chun a ngen a nih.
Sd/-
(STANLEY HMAR)
Secretary, Information & Publicity
HPC(D) Gen Hqrts: Sinlung
