Saikawt, August 15, 2020, Virthli (ONP): India ram hmun hran hran a Independence Day hmang a ni ang bawkin vawisun August 15, 2020 khan CCpur District huopin 74th India Independence Day Saikot playground ah hmang a nih. Hi huna hin Pawan Kumar, IAS, Deputy Commissioner, Ccpur district chu khuolliena thangin, India Flag keipharna neiin parade hai salute lakna neiin thuhrilna hun a hmang.
Hi huna hin chawimawina hunser hmang niin Covid-19 frontline workers hai chawimawi anni bakah CCpur district sunga sawrkar department hran hran a athaw tha bik zuolhai kuomah chawimawina certificte CCpur DC- Pawan Kumar le CCpur SP- Amrita Sinha h'an an inhlan. Hi huna hin CCpur district sunga inruithei dodal na dinga scheme thar " Nasha Mukt Bharat Campaign" ti chu CCpur Deputy Commissioner-in a tlangzar nghal bawk.
Hi hunser hmang ani huna hin Hmar Artiste- Nk.Lawmnakim Hrangate le Tv. Zion Ramthanglur ha'n hla sakin mipui fekhawm hai an inawi a, Saikawt Cultural Troupe han hnam lam inentirna hun an nei.
Covid19 leiin kum dang angin mipui pung khawm a um naw a, CCpur DC, CCpur SP le CCpur District a sawrkar official hai le chanvo nei hai chau an thang a, kum tina inchuklai naupang h'an an lo thaw hlak parade contingent khawm nei a ni nawh. Hi hunser hmang a ni sung hin Saikawt Defence Party (SDP) hai chun an thei ang angin tlawmngaina sin an thaw bawk a nih.
Photographs by Muona Infimate, Virthli(ONP)
